2025 jyly el turǵyndary baspanalaryn jaqsartý úshin zeınetaqy qorynan qansha qarajat aldy
ASTANA. KAZINFORM — 2025 jyly el turǵyndary turǵyn úı jaǵdaılaryn jaqsartý úshin Biryńǵaı jınaqtaýshy zeınetaqy qorynan 221,4 mlrd teńge aldy. Bul týraly Derekterdi óńdeý ortalyǵynan habarlady.
— Jeltoqsanda turǵyn úı jaǵdaıyn jaqsartý maqsatynda biryńǵaı zeınetaqy qorynan 339,1 myń ótinim oryndaldy. Olardyń jalpy somasy 221,4 mlrd teńge. Qarashamen salystyrǵanda, birinshi kórsetkish — 3 esege, al ekinshisi 2,8 esege artty. Jeltoqsandaǵy negizgi maqsat «Odan ary tolyqtyrý úshin turǵyn úı qurylys jınaǵy salymyn tolyqtyrý» boldy. Bul qarashamen salystyrǵanda jeltoqsandaǵy ótinimder sanynyń 4 esege artyp, 182 myńǵa jetkenin kórsetedi. Somasy ótken aıdyń ósim qarqynymen shamalas 118,8 mlrd teńge boldy, — delingen atalǵan ortalyqtyń Telegram paraqshasynda jarııalanǵan aqparatta.
Sondaı-aq el turǵyndary turǵyn úı qurylys jınaǵy júıesindegi ıpotekalyq qaryzdaryn óteý úshin de zeınetaqy qorlaryndaǵy qarajatqa ótinimdi kóptep berdi.
— Bul rette jeltoqsanda bolǵan taǵy bir oqıǵany eske alǵan jón. Jeltoqsan aıynyń alǵashqy on kúndiginde sońǵy 2 jylda alǵash ret 2026 jylǵa arnalǵan eń tómengi jetkiliktilik sheginiń artatyndyǵy jarııalandy. Ol 1 qańtardan bastap ortasha eseppen 10 paıyzǵa artty. Demek, 2025 jyldyń sońynda salymshylar qarajattaryn burynǵy sharttarmen alýǵa múmkindigi boldy, — dedi ortalyqtan.
Biryńǵaı jınaqtaýshy zeınetaqy qory bekitken zeınetaqy jınaqtarynyń 2026 jylǵa arnalǵan eń tómengi jetkiliktilik shegin myna siltemege ótip tanys bola alasyzdar.