2025 jyly dropperlerdiń shottaryndaǵy 800 mln teńge buǵattaldy
ASTANA. KAZINFORM – 2025 jyly «droptar» shottarynda 800,7 mln teńge buǵattaldy. Bul týraly Májilis depýtattarynyń saýalyna Іshki ister mınıstriniń birinshi Baýyrjan Álenovtiń jaýabynda aıtylǵan.
– Dropperlerdiń shottaryn jedel anyqtaý jáne buǵattaý maqsatynda ekinshi deńgeıdegi banktermen «Antıfrod-ortalyq» aıasynda ózara is-qımyl júzege asyrylýda. Platforma jumys isteı bastaǵannan beri (2025 jylǵy 22 shildeden) 99,7 myń oqıǵa tirkeldi, onyń ishinde ishki ister organdary tarapynan – 48,9 myń. Qabyldanǵan sharalardyń nátıjesinde «droptar» shottarynda 800,7 mln teńge buǵattaldy, onyń ishinde 488,4 mln teńge erikti túrde qaıtaryldy. Jiberýshilerdiń shottaryndaǵy kúdikti operatsııalardy monıtorıngteý arqyly 1,9 mlrd teńgeden astam qarajat buǵattaldy, - dedi Baýyrjan Álenov.
Onyń aıtýynsha, ІІM bastamasymen 2025 jylǵy 16 qyrkúıekten bastap dropperlerge qatysty qylmystyq jaýapkershilik engizildi. Atalǵan bap boıynsha 49 qylmystyq is tirkelip, 13-i sotqa joldandy.
– Sotqa deıingi tergep-tekserý protsesiniń tıimdiligi men ońtaılandyrylýyn arttyrý maqsatynda ınternet-alaıaqtyqtan zardap shekkenderge Azamattyq kodeksiniń 953-babynyń normalary aıasynda aqsha qarajatyn qaıtarý tártibi túsindiriledi. Osylaısha AK 953-baby dropperler arqyly aqsha qarajatyn shyǵarýymen baılanysty qylmystyq isterdi tergeý barysynda is júzinde qoldanylyp, jábirlenýshilerdiń múliktik quqyqtaryn qorǵaýǵa jáne keltirilgen zalaldy óteýdi qamtamasyz etýge baǵyttalǵan qylmystyq-protsestik sıpattaǵy sharalarmen ózara baılanysta paıdalanylady, - dedi mınıstrdiń birinshi orynbasary.
Buǵan deıin polıtsııa dropper bolýdyń saldary qandaı ekenin túsindirgen edi.