2025 jyly dári-dármek satyp alýdan 85 mlrd teńgeden astam qarjy únemdeldi
ASTANA. KAZINFORM – Medıtsınalyq uıymdardyń naqty qajettilikterin eskere otyryp júrgizilgen dál josparlaý, ótpeli qaldyqtardy taldaý jáne satyp alý rásimderin ońtaılandyrý nátıjesinde 2025 jylǵy dárilik zattardy satyp alý qorytyndysy boıynsha bıýdjet qarajatynan 85 mlrd teńgeden astam qarjy únemdeldi.
Densaýlyq saqtaý mınıstrliginiń málimetinshe, qabyldanǵan sharalar úzdiksiz dári-dármekpen qamtamasyz etýge múmkindik berdi. Únemdelgen qarajat jyl ishinde emi taǵaıyndalǵan patsıentterdi qosa alǵanda, dárilik zattardyń qosymsha kólemin satyp alýǵa baǵyttalǵan.
Mınıstrlik dereginshe, 2026 jyly SQ-Farmatsııa JShS 2 myńnan astam ataýdaǵy dárilik zattar men medıtsınalyq buıymdardy satyp alýdy josparlap otyr. Medıtsınalyq uıymdarǵa jetkizý qańtardyń alǵashqy kúnderinen bastap kezeń-kezeńimen júzege asyrylady. Bul jyl basynan bastap turaqty dári-dármekpen qamtamasyz etýge múmkindik beredi.
2025 jyly alǵash ret Biryńǵaı dıstrıbıýtor 21 mlrd teńge kóleminde tómendetilmeıtin qor qalyptastyrdy. Bul qor dárilik qamtamasyz etý júıesiniń 2–3 aılyq qajettiligin jabýǵa jáne suranystyń jospardan tys ósýine jedel áreket etýge arnalǵan.
Atalǵan qordyń esebinen 2025 jylǵy tamyz jáne qarasha aılarynda medıtsınalyq uıymdardan jalpy somasy 8,5 mlrd teńge jáne 4,4 mlrd teńge bolatyn qosymsha ótinimder jınalyp, tıisti satyp alýlar júrgizildi. Bul sharalar jańadan anyqtalǵan patsıentterdi qamtamasyz etýge, sondaı-aq jekelegen dárilik preparattar boıynsha ýaqytsha tapshylyqty jabýǵa baǵyttaldy.
- Qabyldanǵan sheshimder qant dıabeti, onkologııalyq aýrýlar, aǵzany transplantattaý jáne gemofılııa sııaqty áleýmettik máni bar aýrýlar boıynsha emniń úzdiksizdigin saqtaýǵa múmkindik berdi. Jyl ishinde birqatar medıtsınalyq uıymdarda qant dıabetin emdeýge arnalǵan dárilik zattarǵa qosymsha qajettilik týyndap, bul ótinimder jedel tártipte qaralyp, tómendetilmeıtin qor esebinen dáriler aýrýhanalar men emhanalarǵa ýaqtyly jetkizildi, - dep habarlady mınıstrlikten.
Qazirgi ýaqytta Qazaqstanda 382 transplantattaý jasalǵan, onyń ishinde 2025 jyly qosymsha 31 jańa patsıent tirkelgen. Mınıstrlik málimetinshe, bul patsıentter úshin dárilik zattar shuǵyl tártipte satyp alynyp, jetkizilgen.
Densaýlyq saqtaý mınıstrligi dárilik qamtamasyz etý salasynda jetkizilimderdiń turaqtylyǵyn, josparlaý men satyp alý protsesteriniń ashyqtyǵyn, sondaı-aq dárilik preparattardy árbir patsıentke deıin naqty ári ýaqtyly jetkizýdi qamtamasyz etýge baǵyttalǵan júıeli ózgeristerdiń jalǵasyp jatqanyn atap ótti.
Aıta keteıik, biryńǵaı dıstrıbıýtor Qyzylordaǵa dárilik zattardyń 91% jetkizip berdi.