2025 jyly balabaqshalardyń bári vaýcherlik qarjylandyrýǵa kóshe bastaıdy
ASTANA. KAZINFORM – 2025 jyldan bastap qaı balabaqshaǵa bıýdjetten qansha aqsha aýdarylatynyn ata-analar sheshe bastaıdy. Vaýcherlik qarjylandyrý tásiline negizdelgen júıe qazir qanatqaqty joba retinde úsh qalada jumysyn bastady.
Oqý-aǵartý mınıstrligi Mektepke deıingi bilim berý departamentiniń dırektory Manara Adamova ortalyq kommýnıkatsııalar qyzmetinde ótken baspasóz máslıhatynda osyndaı málimet aıtty.
«Vaýcherlik qarjylandyrý júıesi qazirgi tańda Taraz qalasynda qanatqaqty rejımde jumys istep tur. Endi Túrkistan jáne Shymkent qalalary qosylady. Al búkil respýblıkaǵa masshtabtaý 2025 jylǵa josparlanǵan. Onyń ózinde ár óńirdiń daıyndyq deńgeıine qaraı engizemiz. Sol daıyndyq deńgeıine qaraı júıege qosý kestesin jasaımyz», - dedi departament dırektory.
Mınıstrlik mamany bul júıe mektepke deıingi uıymdarǵa qabyldaýdyń ashyqtyǵyn qamtamasyz etedi dep otyr.
«Mınıstrlik derbestendirilgen qarjylandyrýǵa (vaýcherlik qarjylandyrý) kóshý tetigin synaqtan ótkizýde. Ata-analardyń mektepke deıingi uıymdardy derbes tańdaýy jáne «qarajatty balanyń sońynan ilestirý» qaǵıdaty boıynsha berilgen aqshalaı qarajatty vaýcher arqyly mektepke deıin uıymdarǵa aýdarý sybaılas jemqorlyq táýekelderin azaıtady dep kútilýde», - dedi ol.
