2025 jyly Ázerbaıjanǵa barǵan qazaqstandyqtar sany 87 myńnan asty

ASTANA. KAZINFORM — Ázerbaıjanǵa barǵan barlyq sheteldikterdiń ishinde 4%-y qazaqstandyqtar boldy. Bul rette otandyq saıahatshylardyń sany byltyrǵy jylmen salystyrǵanda 19,4%-ǵa artqan, dep habarlaıdy Kazinform agenttiginiń menshikti tilshisi Ázerbaıjannyń Memlekettik shekara qyzmetine silteme jasap.

Vedomstvo derekterine sáıkes, eń kóp týrıst Reseıden (24,4%), Túrkııadan (17,4%), Irannan (8%), Úndistannan (6,6%), Saýd Arabııasynan (4,3%) jáne Grýzııadan (4,2%) kelgen. Barlyq kelgenderdiń ishinde 66,4%-y erler, 33,6%-y áıelder bolǵan.

Al Qazaqstan azamattary jalpy kelýshilerdiń 4%-yn quraǵan nemese 87 804 adamǵa jetken. Bul kórsetkish ótken jylmen salystyrǵanda 19,4%-ǵa ósken.

Aıta keterligi, sheteldik qonaqtardyń shamamen úshten ekisi Ázerbaıjanǵa áýe kóligimen barǵan — 76,3%. Taǵy 22,4% temirjol jáne avtokólik arqyly jetken, al nebári 1,3% teńiz qatynasyn paıdalanǵan.

Jalpy qańtar-qazan aılarynda Ázerbaıjanǵa 183 elden 2,171 mln shetel azamaty saparlaǵan. Bul ótken jyldyń sáıkes kezeńimen salystyrǵanda 1,7%-ǵa az (2,209 mln).

Sondaı-aq Ázerbaıjannyń Týrızm jónindegi memlekettik agenttiginiń málimetinshe, Ortalyq Azııa elderiniń ishinde Ázerbaıjanǵa eń kóp týrıst Qazaqstannan keletin kórinedi. Máselen, Qazaqstannan 87 804 adam (jyldyq ósim — 19,4%), Ózbekstannan — 50 971 adam (+35,8%), Túrikmenstannan — 26 887 (-1,3%), Qyrǵyzstannan — 9 422 (+37,3%), Tájikstannan — 8 124 adam (+80,2%) barǵan.

Sonymen birge, 2025 jyldyń qazan aıynda Ázerbaıjanǵa kelgen sheteldikter sany boıynsha TOP-10 eldiń ishinde Qazaqstan altynshy (9 677 adam), al Ózbekstan onynshy oryndy (6 481 adam) ıelendi.

Agenttik atap ótkendeı, 2024 jyly Ortalyq Azııa elderinen Ázerbaıjanǵa týrıster aǵyny 34,1%-ǵa ósip, 180 528 adamǵa jetken.

Al 2017–2024 jyldar aralyǵynda Ázerbaıjandy óńirden kelgen barlyǵy 726 258 týrıst aralaǵan. Qonaqtar sany boıynsha birinshi orynda Qazaqstan (331 428 adam), odan keıin Ózbekstan (182 310), Túrikmenstan (178 236), Qyrǵyzstan (30 011) jáne Tájikstan (24 246) tur.

Tamyz aıynda Qazaqstannan Ázerbaıjanǵa barǵan týrıster sany ótken jylmen salystyrǵanda 20,6%-ǵa artqany habarlanǵan. Qazaqstan jalpy týrıstik aǵynda 4% úlespen elder reıtınginde 7-oryndy ıelengen.

Osyǵan deıin Qazaqstan medıtsınalyq týrızmdi damytatynyn jazǵan edik.