2025 jyly Astanada ulttyq travmatologııa jáne ortopedııa ortalyǵy salynady
ASTANA. KAZINFORM – Elordada kelesi jyly Ulttyq travmatologııa jáne ortopedııa ortalyǵynyń qurylysy bastalady. Bul týraly Densaýlyq saqtaý mınıstrligi habarlady.
«Astana qalasynyń ákimdigi jańa ǵımarat salýǵa Hýseın ben Talal kóshesinen jer bóldi. Qurylysy 2025 jyly bastalýy kerek. Búginde ulttyq ortalyqty ınfraqurylymmen qamtý máseleleri qaralyp jatyr. Ulttyq travmatologııa jáne ortopedııa ortalyǵy jobalyq-smetalyq qujattardy ázirleý úshin bıýdjettik ótinish berdi», - dep jaýap berdi Densaýlyq saqtaý mınıstrligi qoǵammen baılanys bóliminiń dırektory Ásel Artakshınova Kazinform agenttiginiń tilshisine.
Mınıstrlik ókiliniń aıtýynsha, ol bıylǵy respýblıkalyq bıýdjetti naqtylaý kezinde qaralady.
Eske sala keteıik, ótken jyly aqpanda elordada travmatologııa jáne ortopedııa ortalyǵyna ǵımarat salýǵa jer tabylmaı jatqany aıtyldy.
Sol kezdegi QR Premer-Mınıstriniń orynbasary Altaı Kólginov jumysty jedeldetýdi tapsyrdy.
Aıta ketsek, qazirgi N.Bátpenov atyndaǵy Ulttyq travmatologııa jáne ortopedııa ǵylymı ortalyǵy 1971 jyly salynǵan. Ǵımarattyń jalpy aýdany 24 356 sharshy metrdi quraıdy ári tozyǵy jetken.