2025 jyly Astanada káriz sýyn tazalaıtyn júıe qurylysy salynady
ASTANA. KAZINFORM – Elordada káriz júıesin jetildirý baǵytynda birqatar sharýa iske asyp jatyr. Tolyǵyraq Astana bas jospary ǵylymı-zertteý jobalaý ınstıtýtynyń bas dırektory Rýslan Jaqypov aıtyp berdi.
«Qalada táýligine 254 myń tekshe metr káriz sýyn tazartý qurylysy jumys isteıdi. Bas josparda 2025 jyly táýligine 188 myń tekshe metr káriz tazartý qurylys jaıyn salý kózdelgen. Tereń tazartylǵan sarqyndy sý tehnıkalyq sýmen jabdyqtaýǵa, jasyl-jelekti sýarýǵa jáne Esil men Nura ózenine burý kózdelip otyr. Keshendi jospardy iske asyrý sapaly sýmen qamtý men 126 shaqyrym sý burý jelisin salýǵa jáne qaıta qurýǵa múmkindik beredi», - dedi Rýslan Jaqypov elorda máslıhaty janyndaǵy qoǵamdyq keńes otyrysynda.
Onyń aıtýynsha, 2030 jylǵa deıin elordada sý burýǵa shamamen 500 mlrd teńge qarajat qajet.
Aıta keteıik, búgin Astana bas jospary mekemesiniń qabyrǵasynda qoǵamdyq keńes otyrysy ótti. Ol jerde elordanyń 2035 jylǵa deıin bas josparyn iske asyrý barysy talqylandy. Jobanyń maqsaty – jınaqy ári tıimdi qala qurý.
Eske sala ketsek, bıyl jazda eki kún qatarynan tolassyz jaýǵan jaýynnan keıin Astana kósheleri sý astynda qaldy. Jergilikti turǵyndar áleýmettik jelilerde qalanyń drenaj júıesine narazy ekenin jarysa jazdy, sondaı-aq Astana qalasy halyq arasynda Venetsııa atanǵan edi.
Sonymen qatar qaladaǵy sý jáne káriz júıesi jańǵyrtylyp jatqany týraly habarlaǵan bolatynbyz. Keıbir káriz júıeleri ótken ǵasyrdyń 70-80 jyldarynan beri jóndeý kórmegen bolyp shyqty.