2025 jyly Astana ekonomıkasy 11,6%-ǵa ósti
ASTANA. KAZINFORM — 2025 jyldyń qorytyndysy boıynsha Astanada ekonomıkanyń turaqty ósýi baıqalyp, negizgi maqsatty ındıkatorlar boıynsha oń dınamıka qalyptasty. Sondaı-aq qala damýyna baǵyttalǵan ınvestıtsııa kólemi de artqan.
Bul týraly Astana qalasy máslıhatynyń elordanyń 2025 jylǵy bıýdjetiniń atqarylýy týraly esepti bekitýge arnalǵan sessııasynda «Astana qalasynyń ekonomıka jáne bıýdjettik josparlaý basqarmasy» MM basshysy Aıjan Túgelbaeva aıtty.
— Elorda damýynyń 2025 jylǵa arnalǵan josparynda 38 maqsatty ındıkator qarastyrylǵan. Jyl qorytyndysy boıynsha, 24 kórsetkish oryndaldy, al 12 ındıkator boıynsha josparly kórsetkishke qol jetkizilmegen, 2 ındıkator boıynsha naqtylaý jumystary júrgizilip jatyr, sebebi túpkilikti statıstıkalyq derekter keıinirek jarııalanady. Jalpy alǵanda, jospardy iske asyrý qala damýynyń negizgi baǵyttary boıynsha turaqty ilgerileýdi kórsetip otyr, — dedi basqarma basshysy.
Spıkerdiń sózinshe, ekonomıkalyq blokta da oń serpin baıqalady. Jalpy óńirlik ónim 33%-ǵa ósip, josparlanǵan 29%-dan asyp túsken.
— 2025 jyly qala ekonomıkasy 11,6%-ǵa artty, bul ónerkásip, saýda, qurylys jáne kólik-logıstıka salalarynyń belsendi damýyn kórsetip otyr. Negizgi kapıtalǵa salynǵan ınvestıtsııalar kólemi 2,5 trln teńgeni qurap, 21%-ǵa ósti, — dedi Aıjan Álimqyzy.
Basqarma basshysynyń aıtýynsha, jospardy iske asyrý kezeńinde elorda ekonomıkasyna jalpy 8,8 trln teńge ınvestıtsııa tartylǵan. Onyń 66%-y jeke ınvestıtsııalarǵa tıesili.
— Sondaı-aq shaǵyn jáne orta bıznestiń róli artty: onyń jalpy óńirlik ónimdegi úlesi 66%-ǵa jetip, josparly 61,7%-dan joǵary boldy. ShOB-ty qoldaýǵa bıýdjetten 49 mlrd teńge bólindi, — dep atap ótti ol.
Buǵan deıin Qazaqstan ekonomıkasy tórt aıda 3,6%-ǵa óskeni týraly jazǵanbyz.
