2025 jyly Almaty oblysynda 400 shaqyrymnan astam respýblıkalyq avtojol jóndeledi
QONAEV.KAZINFORM - Almaty oblysynda kelesi jyly respýblıkalyq, oblystyq jáne jergilikti mańyzy bar birqatar joldarǵa jóndeý jumystaryn júrgizý josparlanǵan. Kazinform tilshisi bıyl jóndelgen jáne 2025 jyly jóndeletin joldarǵa sholý jasady.
«QazAvtoJol» UK» málimetine sáıkes, bıyl Almaty oblysy boıynsha uzyndyǵy 123 shaqyrym bolatyn respýblıkalyq mańyzy bar avtomobıl joldaryna jóndeý jumystary júrgizilgen. Onyń ishinde 87 shaqyrym rekonstrýktsııalaý jumystarymen, 36 shaqyrym ortasha jóndeý jumystarymen qamtylǵan. Bul jumystarǵa jalpy - 15,7 mlrd teńge jumsaldy. Al kelesi jyly 441 shaqyrym jol jóndelmek.
- 2025 jyly uzyndyǵy 441 shaqyrym avtojoldardy jóndeý josparlanǵan, onyń 247 shaqyrymyna ortasha jóndeý júrgiziledi. Jol ýchaskelerin jóndeýge 30 mlrd teńge bólý josparlanyp otyr, - dedi «QazAvtoJol» UK» AQ Basqarma
tóraǵasynyń orynbasary Syrym Hamzın.
Al Almaty oblysynyń jolaýshy kóligi jáne avtomobıl joldary basqarmasynyń málimetine sáıkes, oblystyń 9 aýdany jáne 2 qalasynyń avtomobıl joldarynyń 308,4 shaqyrymyna aǵymdaǵy jóndeý jáne ortasha jóndeý jumystary júrgizilgen jáne 253,4 shaqyrymyna jumystar áli de júrgizilip jatyr. Onyń ishinde:
1. Balqash aýdany – aıaqtalǵany 2,3 km, jalǵasýda – 2,6 km;
2. Jambyl aýdany – aıaqtalǵany 28 km, jalǵasýda – 9,7 km;
3. Eńbekshiqazaq aýdany – aıaqtalǵany 70 km; jalǵasýda – 46,9 km;
4. Іle aýdany aıaqtalǵany 33,7 km, jalǵasýda – 32,06 km;
5. Talǵar aýdany – aıaqtalǵany 37,8 km, jalǵasýda – 31,2 km;
6. Qarasaı aýdany – aıaqtalǵany 52 km, jalǵasýda – 19,2 km;
7. Kegen aýdany – aıaqtalǵany 23,4 km, jalǵasýda – 76,5 km;
8. Raıymbek aýdany – aıaqtalǵany 24,4 km, jalǵasýda – 4 km;
9. Uıǵyr aýdany – aıaqtalǵany 21,2 km, jalǵasýda – 9,4 km;
10. Alataý qalasy – aıaqtalǵany 6,3 km, jalǵasýda –13,3 km;
11. Qonaev qalasy – aıaqtalǵany 5,7 km, jalǵasýda – 8,5 km.
Aıta ketken jón, Almaty oblysynyń ákimshilik ortalyǵy Qonaev qalasynda bıyl 22 kóshege shuńqyrlardy jabý jumystary júrgizilse, al 21 myń m² jýyq 9 kóshede aǵymdaǵy jóndeý jumystary boldy.
- 2025 jylǵa oblystyq mańyzy bar avtomobıl joldaryn salý, jóndeý jáne qaıta qurý boıynsha 279,9 shaqyrym jumys júrgizý josparlanǵan. Búgingi kúni oblystyq bıýdjettik komıssııa qaraýyna bıýdjettik ótinim joldandy. Osy jyldyń jeltoqsan aıynyń ekinshi jartysynda máslıhat sheshimi negizinde bıýdjet qarajaty bólingen jobalar boıynsha 2025 jyly jumystar júrgiziletin bolady, - dep habarlady basqarmadan.
Sondaı-aq oblys boıynsha shamadan tys júk tasymaldaıtyn kólikter jol tósemine zııan keltirmeýi úshin jergilikti avtomobıl joldaryna 2 avtomattandyrylǵan ólsheý stantsııalary ornatylǵan. Aldaǵy ýaqytta taǵy úsheýi qoıylmaq.
Eske salaıyq, buǵan deıin Almaty oblysynda birneshe avtojol kóktemge deıin jabylǵanyn jazǵanbyz.