2025 jyly agrarshylardy forvardtyq qarjylandyrýǵa 30 mlrd teńge bólindi
ASTANA. KAZINFORM – 2025 jyly «Azyq-túlik kelisimshart korporatsııasy» jelisi boıynsha agrarshylardy forvardtyq qarjylandyrýǵa 30 mlrd teńge bólindi.
Bıyl ulttyq astyq operatory aýyl sharýashylyǵy taýaryn óndirýshilerdi forvardtyq kelisimsharttar arqyly qarjylandyrýǵa 30 mlrd teńge bóldi. Nátıjesinde fermerler qaýymdastyǵy arasynda eń suranysqa ıe memlekettik baǵdarlama aıasynda 194 sharýashylyq qarjylaı qoldaý aldy.
Aýyl sharýashylyǵy mınıstrligi málimetinshe, 2025 jylǵy 19 jeltoqsanda «Azyq-túlik kelisimshart korporatsııasy» 2026 jylǵy kóktemgi egis jumystaryna aldyn ala tólem sharttarymen erte qarjylandyrýǵa agrarshylardan ótinim qabyldaýdy bastady. Bul maqsattarǵa shamamen 40 mlrd teńge bólý josparlanyp otyr.Memlekettik qoldaý sharasy shaǵyn jáne orta fermerlerge de, iri agroónerkásiptik kásiporyndarǵa da qoldanylady.
Forvardtyq qarjylandyrý baǵdarlamasy aıasynda joǵary marjınaldy daqyldar óndirisin yntalandyrýǵa basymdyq saqtalady. Jańa agrarlyq maýsymda júgeri ósirýge mamandanǵan sharýashylyqtardy aldyn ala qarjylandyrý kózdelgen. Jalpy, ulttyq operator bıdaı, arpa, kúnbaǵys, maıly zyǵyr tuqymy jáne raps óndirisin aldyn ala qarjylandyrýdy júzege asyrady.
Sonymen qatar «Azyq-túlik kelisimshart korporatsııasy» BUU Damý baǵdarlamasynyń Qazaqstandaǵy «Soltústik Qazaqstan landshafty ekojúıelerin saqtaý jáne aýyl sharýashylyǵy óndirisiniń turaqty júıesin ilgeriletý» jobasy aıasynda qyzyl jasymyqty uzaq merzimdi forvardtyq qarjylandyrýdy iske qosty.
Qazaqstan Ortalyq Azııada osy baǵdarlamaǵa qosylǵan alǵashqy el boldy. Soltústik Qazaqstan, Aqmola jáne Qostanaı oblystarynyń fermerleri «Azyq-túlik kelisimshart korporatsııasymen» jasymyq jetkizýge arnalǵan úsh jyldyq kelisimsharttar jasaıdy dep boljanyp otyr.
Baǵdarlamaǵa qatysýdyń mindetti sharty — zamanaýı agrotehnologııalardy qoldaný jáne ǵylymı uıymdardyń usynymdaryna sáıkes egis aınalymyn saqtaý.
Joba ónimdilikti arttyrýǵa, topyraq qunarlylyǵyn saqtaýǵa jáne avanstyq qarjylandyrý tetigi arqyly agrarshylardyń ekonomıkalyq múmkindikterin keńeıtýge baǵyttalǵan.
Fermerler qaýymdastyǵy arasynda suranysqa ıe taǵy bir qarjylyq qural — dándi jáne maıly daqyldardy tikeleı satyp alý. Interventsııalyq mehanızm agrarshylarǵa aýyl sharýashylyǵy ónimin ádil baǵamen ótkizýge múmkindik beredi. Bıyl ulttyq operator bıdaı men arpadan bólek, kúnbaǵys, maıly zyǵyr jáne qaraqumyqty qabyldaýdy júzege asyryp jatyr.
Aıta keteıik, mańyzdylyǵy men ereksheligi jaǵynan ekonomıkanyń biregeı sektory sanalatyn elimizdiń aýyl sharýashylyǵy salasy bıyl óte jaqsy nátıjelerge qol jetkizdi. Mol astyq bastyrylyp, ishki naryqqa jetkilikti kókónis ónimi jınaldy. Tipti maqta men maıly daqyldardyń rekordtyq kólemi alyndy. Mal basy da turaqty artyp kele jatyr. Osyǵan oraı, ótip bara jatqan jyl ishindegi aýyl sharýashylyǵynyń nátıjelerine sholý jasaǵan edik.