2025 jyly 515 jańa BAQ tirkeldi
ASTANA. KAZINFORM – Byltyr elimiz boıynsha 515 jańa buqaralyq aqparat quraly tirkeldi. Bul týraly Senat depýtattarynyń saýalyna Premer-mınıstr Oljas Bektenovtiń jaýabynda aıtylǵan.
– Aýdandyq jáne qalalyq gazetter qorlarynyń saqtalýyna qatysty óńirler boıynsha taldaý jasaldy. Búginde elimizde 50 29 buqaralyq aqparat quraly tirkelgen. 2025 jyldyń qorytyndysy boıynsha el aýmaǵynda 515 jańa BAQ tirkeldi. Barlyq oblysta aýdandyq jáne qalalyq gazetterdiń mindetti tegin danalary kitaphanalarda, baspasóz basylymdardyń qorlarynda jáne jeke arhıvterde saqtalýda, - dedi Oljas Bektenov jaýabynda.
Máselen, Úkimet basshysynyń dereginshe, Almaty qalasynda «Almaty aqshamy», «Vechernıı Almaty» (1936 jylǵy 28 sáýirden bastap shyǵatyn) gazetteriniń barlyq sanynyń tigindileri «Alataý aqparat» JShS medıaholdınginde saqtaýly. Eki gazettiń 1970-2021 jyldardaǵy sandary tsıfrlandyryldy. Tsıfrlandyrylǵan basylymdardyń jalpy kólemi - «Almaty aqshamy» 3 306 gazet, «Vechernıı Almaty» 8 551 gazet. Qalǵan kezeńder boıynsha tsıfrlandyrý jumystary jalǵasyp jatyr.
– Abaı oblysynda 1943-2025 jyldar aralyǵynda jaryq kórgen 16 gazettiń 18 323 danasy saqtaýly tur. Almaty oblysynda 16 gazet, 4 jýrnal jumys isteıdi, jınaqtalǵan tigindilerdi tsıfrlandyrý jumysy qolǵa alyndy. Aqtóbe oblysynda «Aqtóbe Medıa» JShS qarasty oblystyq qoǵamdyq-saıası «Aqtóbe» gazeti 1924 jyldan, «Aktıýbınskıı vestnık» gazeti 1918 jyldan bastap shyǵyp keledi. Osy gazetterdiń elektrondyq (PDF) formattaǵy danalary ózderiniń arhıv qorynda saqtaýly tur. Sondaı-aq, 12 aýdandyq gazet jumys isteıdi, olar qazirgi tańda jekeshelendirilip, aptasyna 1 ret shyǵady. Bul aýdandyq gazetterdiń qorlary memlekettik kitaphanalarǵa tapsyrylǵan, - dedi ol.
Úkimet basshysynyń atap ótýinshe, Aqmola oblysynda shyǵatyn gazet sany – 40. 1941-2025 jyldarda jaryq kórgen 120 466 dana gazet saqtaýda tur.Atyraý oblysynda qalalyq kitaphanaǵa 1921-1922, 1930-2021 jyldardy qamtıtyn gazetter saqtaýǵa alynǵan. Onyń 9 983 beti tsıfrlyq formatqa kóshirilgen. 1974-2025 jyldardaǵy gazetterdiń tigindileri fotosýret nusqasynda jáne elektrondyq formatta redaktsııada saqtaýly.
– Astana qalasy, Jambyl, Shyǵys Qazaqstan, Qaraǵandy oblystaryndaǵy gazetterdiń tigindileri baspasóz basylymdardyń arhıvterinde jáne kitaphanalarda saqtalýda, - dedi Premer-mınıstr.
Buǵan deıin «Biryńǵaı medıa-platforma» aqparattyq júıesi ázirlenip jatqanyn jazǵan edik.