2025 jyly 19 zań jobasyn ázirleý josparlanyp otyr — Ádilet mınıstri
ASTANA. KAZINFORM — 2025 jyly 19 zań jobasy ázirlenedi. Bul týraly Úkimet otyrysynda QR Ádilet mınıstri Azamat Esqaraev málimdedi.
«Ádilet mınıstrligi Memleket basshysynyń, Úkimet basshylyǵynyń tapsyrmalary, strategııalyq qujattar, memlekettik organdar usynystarynyń negizinde Úkimettiń 2025 jylǵa arnalǵan zań jobalaý jumystary josparynyń jobasyn daıyndady. Jospar jobasy aıasynda 2025 jyly densaýlyq saqtaý, medıtsınalyq saqtandyrý, quqyq buzýshylyqtardyń aldyn alý, balamaly energetıkany, telekommýnıkatsııa naryǵyn damytý jáne basqa da ózekti baǵyttar boıynsha 19 zań jobasyn ázirleý kózdelgen. Onyń altaýy — jańa redaktsııadaǵy zań jobalary. Úsheýi qoldanystaǵy zańdarǵa túzetýler engizýdi kózdeıdi», — dedi Ádilet mınıstri.
Vedomstvo basshysy jospar jobasynda kelesi jyly bıýdjettiń múmkindikteri men mindettemelerin eskere otyryp, bazalyq memlekettik medıtsınalyq kómektiń biryńǵaı paketin, sondaı-aq osy salany damytý maqsatynda telekommýnıkatsııalar men derekterdi óńdeý ortalyqtary máseleleri boıynsha zań jobalaryn ázirleý kózdelgenin atap ótti.
Odan bólek, saılaý týraly zańnamany jetildirýge jáne balamaly energııa kózderi salasyn damytýǵa baǵyttalǵan zań jobalaryn ázirleý josparlanǵanyn aıtty.
«Memlekettik qyzmetti damytýdyń 2024-2029 jyldarǵa arnalǵan tujyrymdamasyn iske asyrý sheńberinde jospar jobasynda memlekettik qyzmet týraly zań jobasyn jańa redaktsııada jáne oǵan ilespe zań jobasyn ázirleý kózdelgen. Zań jobasy servıske jáne klıentke baǵdarlaný qaǵıdattaryna negizdelgen túpkilikti nátıjege baǵdarlanǵan. Memlekettik qyzmettiń gıbrıdti modelin paıdalana otyryp, memlekettik aqparatty kásibılendirýdi kózdeıtin memlekettik qyzmet modelin qalyptastyrýǵa baǵyttalǵan. Budan basqa, jospardyń jobasy respýblıkalyq bıýdjet jáne ulttyq qordan kepildendirilgen transfert týraly jyl saıynǵy negizdegi ázirlenetin zań jobalaryn kózdeıdi. Osylaısha jospar jobasy memlekettik retteýdiń ózekti mindetterin sheshý úshin qajetti zań jobalaryn qamtıdy jáne memleket damýynyń saıası baǵytymen sáıkes keledi», — dedi spıker.
Jospar jobasy barlyq múddeli memlekettik organdarmen kelisilgen.
Buǵan deıin Úkimet otyrysynda elimizde 203 myń múmkindigi shekteýli bala tirkelgeni habarlandy.
Sonymen qatar, múmkindigi shekteýli balalar úshin mektepte «jeke kómekshi» laýazymy engiziletini aıtyldy.
