2025 jyly 18 myń shaqyrym jol jóndeledi
ASTANA. KAZINFORM – 2025 jylǵa ekonomıkanyń naqty sektoryn qoldaýǵa 2,1 trln teńge kózdelgen. Bul týraly Úkimet otyrysynda Premer-mınıstrdiń orynbasary – Qarjy mınıstri Mádı Tákıev aıtty.
«2025 jylǵa ekonomıkanyń naqty sektoryn qoldaýǵa 2,1 trln teńge kózdelgen. Bul baǵytta kelesi basymdyqtar qarastyrylǵan. Birinshi – 635 mlrd teńge kóleminde shyǵystardy quraıtyn agroónerkásiptik keshendi damytý. Bul baǵyt aıasynda kóktemgi egis jáne egin jınaý jumystaryna jeńildikpen kredıt berý, «Aýyl amanaty» jobasy sheńberinde aýyl halqynyń tabysyn arttyrý, Soltústik Qazaqstan oblysy tájirıbesi boıynsha iri ınvestıtsııalyq jobalarǵa kredıt berý, sondaı-aq agroónerkásiptik keshendi sýbsıdııalaý josparlanyp otyr», - dedi Mádı Tákıev.
Onyń atap ótýinshe, ekinshiden, respýblıkalyq deńgeıde kólik ınfraqurylymyn damytýǵa 568 mlrd teńgege kózdelgen. Bul qarajat esebinen 18 myń shaqyrymnan astam jol tıisti jumystarmen qamtamasyz etiledi. Memlekettik kepildikpen beriletin qaryzdar esebinen respýblıkalyq mańyzy bar avtomobıl joldarynyń 10 jobasy rekonstrýktsııalanady jáne 7 292 birlik mólsherinde temirjol vagondarynyń jyljymaly quramynyń parki jańartylatyn bolady.
«Úshinshi – 204 mlrd teńge shyǵystardy quraıtyn shaǵyn jáne orta bıznesti qoldaý. Bul qarajat jeke kásipkerlik sýbektileriniń kredıtteri boıynsha qabyldanǵan mindettemelerdi óteýge arnalǵan syıaqy mólsherlemesin sýbsıdııalaýǵa, operatorlyq qyzmetter kórsetýge, sondaı-aq kásipkerlik áleýetti damytýǵa baǵyttalady», - dedi ol.
