2025 jyly 10 myń bıznes-bastamaǵa qoldaý kórsetiledi
ASTANA. KAZINFORM — QR Ulttyq ekonomıka mınıstrligi bıznestiń jeńildikpen qarjy alýyn keńeıtý úshin «Damý» qory arqyly eki jańa qoldaý quralyn iske qosty.
Olar kez kelgen aýqymdaǵy kompanııaǵa, meıli ol kishi bolsyn, meıli iri bolsyn, kepil jetkiliksiz bolǵan kúnde de qarjy alýǵa múmkindik beredi.
Birinshi qoldaý quraly quny 7 mlrd teńgeden bastalatyn aýqymdy jobaǵa eseptelgen. Ónerkásip, energetıka, ınfraqurylym men eksportty qosa alǵanda, ekonomıkanyń negizgi salalaryn qamtıdy. Memleket qaryzǵa kepildik bergendikten, bul bank úshin táýekeldi azaıtady. Osylaısha bıznestiń nesıe alýy jeńildeıdi.
Ekinshi qoldaý shaǵyn jáne orta kásiporynǵa jasalady. Quny 7 mlrd teńgege deıingi jobalarǵa tıesili. Kásipkerler qajetti qarjyny kepilsiz alady. Búgingi tańda bes bankpen kelisimge qol qoıylsa, taǵy ekeýi jumys ústinde. Áriptester tizimin keńeıtý jumysy júrip jatyr.
Baǵdarlamanyń alǵashqy nátıjesi de belgili. Jalpy somasy 3,3 mlrd teńgege 34 joba qoldaý tapqan. Kepildik berý rásimi jeńildetilip, eki jumys kúni ishinde oryndalady. Muny alýshy — óndiris, kólik, bilim berý sekildi túrli sala ókili.
— 2025 jyldyń sońyna deıin 10 myń joba qoldaý tappaq. 2028 jylǵa qaraı kepildik portfeliniń kólemi 1,4 trln teńgege jetkiziledi. Osylaısha, jyl saıyn bıznestiń 50 myńnan astam bastamasyna qoldaý kórsetiledi, — delingen habarlamada.
Búgingi tańdaǵy Damý qorynyń áriptesteri Bank TsentrKredıt, Halyk Bank, Freedom Bank, Fortebank, Bank RBK, Bereke Bank pen Qazaqstan–Zıraat Interneshnl Bank. Kásipkerge nesıe somasynyń 85%-na deıin qordyń kepildigi berilgendikten, qaryzdy ońaı ala alady.
Jańa tetikterdiń arqasynda qarjylyq ınfraqurylym turaqty túrde damyp, bankterdiń táýekeli azaıady, otandyq bıznestiń ósý múmkindigine úles qosylady.
Bul bastamalar ekonomıkalyq ósýdi jedeldetý sharalary sheńberinde iske asyrylyp jatyr.
Esterińizge sala keteıik, buǵan deıin 2025 jyly «Báıterek» holdınginiń kapıtalyn 1 trln teńgege ulǵaıtý josparlanǵany habarlanǵan. Osynyń arqasynda, 8 trln teńgege deıingi qarajatty jańa jobalardy iske qosýǵa arnap, óndiristiń qýatyn ulǵaıtýǵa, joǵary ónimdi jumys ornyn qurýǵa múmkindik artady.
Osydan buryn Qazaqstanda bıznes kredıtke kepildik beretin qor jumysyn bastaǵanyn jazǵanbyz.