«2025 jylǵy joǵary oqý ornynyń úzdik oqytýshysy» baıqaýynyń jeńimpazdary anyqtaldy

ASTANA.KAZINFORM - Respýblıkalyq konkýrstyq komıssııanyń otyrysynda «2025 jylǵy Joǵary oqý ornynyń úzdik oqytýshysy» ataǵynyń ıegerleri belgili boldy. Baıqaý nátıjesinde óz salasynda ozyq shyqqan eń úzdik oqytýshylar tańdaldy.

Ǵylym jáne joǵary bilim mınıstrligi málimetinshe, «Joǵary oqý ornynyń úzdik oqytýshysy» ataǵy elimizdiń 37 joǵary oqý ornynan 150 oqytýshyǵa berildi. Konkýrsqa elimizdiń 89 joǵary oqý ornynan 502 úmitker qatysty. 

Konkýrs barysynda elektrondyq bilim berý resýrstary men oqý-ádistemelik materıaldardy ázirleý jáne jarııalaý, otandyq jáne halyqaralyq ǵylymı jýrnaldardaǵy ǵylymı jarııalanymdar, patentter jáne oqytýshylardyń ózge de ǵylymı nátıjeleri sııaqty kórsetkishter baǵalandy.

Oqytýdyń sapasyna, úmitkerlerdiń joǵary jáne joǵary oqý ornynan keıingi bilim berý júıesi úshin kadrlar daıarlaýǵa qosqan úlesine erekshe nazar aýdaryldy.
«Joǵary oqý ornynyń úzdik oqytýshysy» konkýrsy 2005 jyldan bastap sońǵy 20 jyl boıy jyl saıyn ótkizilip keledi.

Sońǵy úsh jylda shekti baldyń óskeni baıqalady. Bıyl shekti ball 85 ball boldy, bul 2024 jylmen salystyrǵanda 14 balǵa joǵary (2022 jyl – 45 ball, 2023 jyl – 57 ball). Bul oqytýshylar quramynyń joǵary básekege qabilettiligi men sapasyn kórsetedi.

Atalǵan ataqty ıelený oqytýshylarǵa ǵylymı-zertteý jumystaryn júrgizýge, kásibı biliktiligin arttyrýǵa, sondaı-aq álemniń jetekshi ýnıversıtetteri men ǵylymı ortalyqtarynda taǵylymdamadan ótýge múmkindik beredi.

Konkýrs jeńimpazdarynyń tizimimen QR ǴJBM Telegram-arnasy arqyly tanysýǵa bolady.

Aıta keteıik, Qazaqstanda 3 myńǵa jýyq pedagog-sheber bar.