2025 jylǵy III toqsanda 8 000-nan astam altyn quıma satyldy

ASTANA. KAZINFORM — QR Ulttyq Banki 2025 jylǵy III toqsanda ekinshi deńgeıli bankter (budan ári – EDB) men banktik emes jekelegen aıyrbastaý pýnkterine jalpy salmaǵy 438,4 kg bolatyn 8 302 ólshemdi quıma satty.

Ólshemdi quımalar kóp satylǵan óńirler: Almaty (5 874 dana, 71%), Astana (600 dana, 7%) jáne Qaraǵandy oblysy (460 dana, 6%).

Halyqqa arnalǵan ólshemdi quımalardy Halyk Bank, Eýrazııalyq bank, Jusan Bank, TsentrKredıt Bankinde, sondaı-aq banktik emes jekelegen aıyrbastaý pýnkterinde satyp alýǵa jáne satýǵa bolady. 

Osylaısha, 2025 jylǵy III toqsanda EDB men banktik emes jekelegen aıyrbastaý pýnkteri keri satyp alynǵandy esepke alǵanda, halyqqa jalpy salmaǵy 409,0 kg bolatyn 9 110 ólshemdi quıma satty. Baǵdarlama iske qosylǵaly satylǵan quımalardyń jalpy sany – 246 882, al olardyń jalpy salmaǵy – 8,6 tonna.

Halyq arasynda suranysqa ıe quımanyń salmaǵy – 10 g. Onyń satý kólemindegi jalpy úlesi 26% – 63 740 dana. Odan keıingisi – 5 gramdyq quıma. Satylǵany – 53 978 dana (22%), 100 gramdyq quımadan satylǵany – 50 779 dana (21%), 20 gramdyqtan – 44 707 dana (18%) jáne 50 gramdyq quımadan – 33 678 dana (13%).

Árbir quıma qorǵaý elementterimen qaptalǵan (quımanyń aına beti, mıkrotekst jáne bederli jıegi bar) jáne mehanıkalyq zaqymdanýdan qorǵaıtyn arnaıy qorapqa salynyp shyǵady. Sol arqyly quımanyń ashylǵan-ashylmaǵanyn ońaı tekserýge bolady. Qorǵap turatyn qorap sondaı-aq sapa sertıfıkaty bolyp sanalady. Sondyqtan, altyn quımany uqypty saqtap, qorabyn búldirmeýge keńes beremiz.

Altyn quımalar senimdi ınvestıtsııa quraly bola alady. Altyn quımalar naryǵyndaǵy ótimdiliktiń basty kepili – bank pen banktik emes aıyrbastaý pýnkteri klıentke aqshany sol kúni tóleı otyryp, altyn quımalardy keri satyp ala alady.

Eske sala keteıik, buǵan deıin Túrkııa altyn satyp alýshylardyń aldyńǵy úshtigine kirgenin jazǵan edik.