2025 jylǵy Dúnıejúzilik oıyndar: Qazaqstan delegatsııasy sportshylar qalashyǵyna bardy

ASTANA. KAZINFORM – 7–17 tamyz aralyǵynda Chendý qalasynda ótetin Dúnıejúzilik oıyndar qarsańynda Qazaqstan Ulttyq Olımpıadalyq komıtetiniń bas hatshysy Álimjan Aqaev pen QR Týrızm jáne sport mınıstrligi Sportty damytý dırektsııasy dırektorynyń orynbasary Eset Baıtasov sportshylar qalashyǵyna baryp, Qazaqstan quramasymen kezdesti. Bul týraly UOK baspasóz qyzmeti habarlady. 

Álimjan Aqaev ulttyq qurama múshelerine qoldaý bildirip, aldaǵy jarystarda sáttilik tiledi. Sondaı-aq ol sporttyq etıka men olımpıadalyq qundylyqtardy saqtaýdyń mańyzdylyǵyn erekshe atap ótti. 

Onyń aıtýynsha, Dúnıejúzilik oıyndar – halyqaralyq sporttyq yntymaqtastyqty nyǵaıtýdyń mańyzdy alańy bolmaq. Ol qazaqstandyq sportshylardyń ádil báseke, qurmet pen ózara túsinistik rýhynda joǵary nátıjege qol jetkizetinine senim bildirdi. 

Kezdesý barysynda sportshylardyń turý jaǵdaıy men jarystarǵa daıyndyǵyna qatysty birqatar uıymdastyrýshylyq másele talqylandy. 

Aıta keteıik, Chendý–2025 Dúnıejúzilik oıyndarynda Qazaqstan namysyn 30-dan astam sportshy qorǵaıdy. Olar djıý-djıtsý, karate, sambo, mýaı-taı, akrobatıkalyq gımnastıka, sporttyq quzǵa órmeleý, sadaq atý jáne ýshý syndy sport túrlerinen baq synaıdy. Jalpy, bul oıyndarǵa 114 elden 4 myńnan astam sportshy qatysady.

Buǵan deıin Qytaıdyń Harbın qalasynda ótken IX qysqy Azııa oıyndarynda úzdik nátıje kórsetken otandyq sportshylardy qoldaý maqsatynda Úkimet qaýlysymen 372,6 mıllıon teńge bólingenin jazǵan edik.