2025 jylǵy Dúnıejúzilik oıyndar Chendý qalasynda resmı túrde ashyldy
ASTANA. KAZINFORM — 7 tamyz kúni keshke Qytaı Memlekettik keńesiniń múshesi Shen Itsın Chendý qalasyndaǵy Tıanfý halyqaralyq konferentsııa ortalyǵynda ótken saltanatty rásimde 12-shi Dúnıejúzilik oıyndardyń resmı ashylǵanyn jarııalady, dep habarlaıdy Sınhýa.
«Tıanfý shatyrynyń» astynda — uzyndyǵy 430 metr Azııadaǵy eń iri aǵash qurylymdardyń birinde — 10 myńǵa jýyq kórermen Shen Itsındi dý qol shapalaqpen qarsy alyp, onyń oıyndardyń ashyq ekenin jarııalaýyn qoshemetpen qabyldady. Sharaǵa sondaı-aq Halyqaralyq Dúnıejúzilik oıyndar qaýymdastyǵynyń (IWGA) prezıdenti Hose Perýrena jáne Halyqaralyq Olımpıada komıtetiniń atqarýshy komıtetiniń múshesi Lı Lınveı qatysty.
12-shi Dúnıejúzilik oıyndar 7–17 tamyz aralyǵynda ótedi. Urany — «Sheksiz sport, sheksiz ǵajaıyptar». Bul — Qytaıdyń materıktik bóliginde ótetin alǵashqy Dúnıejúzilik oıyndar. Buǵan deıin, 2023 jyly Chendýda FISU-diń 31-shi Jazǵy Ýnıversıadasy sátti uıymdastyrylǵan bolatyn.
Tarıhı alaý estafetasy
2025 jylǵy oıyndar sheńberindegi erekshe oqıǵalardyń biri — 26 shildede ótken alaý estafetasy boldy. Ol Sychýan provıntsııasynyń mádenı «júregi» sanalatyn áıgili Sansındýı arheologııalyq mýzeıiniń aýmaǵynda uıymdastyrylyp, oǵan 120 alaýshy qatysty.
Oıyndar rekord jańartýda
Chendýdaǵy bul oıyndar tarıhtaǵy eń aýqymdy Dúnıejúzilik oıyndar retinde tirkelip otyr. 116 el men óńirden kelgen 6679 qatysýshy, onyń ishinde 3942 sportshy 34 sport túri boıynsha 256 jarysqa qatysady.
Qytaı bul oıyndarǵa tarıhyndaǵy eń úlken delegatsııany jiberdi — 489 adam, onyń 321-i sportshy. Qytaı quramasy 28 sport túrindegi 152 sanatta jarysqa qatysady. Buǵan qosa, Qytaı alǵash ret 12 jańa sport túri boıynsha debıýt jasaıdy: olardyń qatarynda chırlıdıng, frısbı jáne sý-motorly sport bar. Sondaı-aq, parasportshylar alǵash ret ulttyq quramanyń sapynda óner kórsetpek.
HOK jáne IWGA basshylarynyń pikirleri
HOK prezıdenti Kırstı Koventrı beıneúndeý arqyly jarysqa qatysýshylar men jankúıerlerdi quttyqtap, uıymdastyrýshylarǵa alǵys aıtty.
— Qytaılyq uıymdastyrýshylarǵa kásibıligi, qonaqjaılylyǵy, minsiz uıymdastyrýy jáne áıgili qytaılyq tıimdiligi úshin alǵys aıtamyn. Chendý turǵyndary men eriktilerine shyn júrekten rahmet, — dedi ol.
IWGA prezıdenti Hose Perýrena óz sózinde Chendý qalasynyń eńbegin erekshe atap ótti.
— Sizderdiń kóregendikterińiz, tynymsyz eńbekterińiz jáne Dúnıejúzilik oıyndardyń qundylyqtaryna degen senimderińiz úshin alǵys aıtamyn. Chendý — sen jaı ǵana qojaıyn emessiń, sen — osy oıyndardyń júregisiń, — dedi ol.
Aıta keteıik, bul Dúnıejúzilik oıyndar — Perýrena myrzanyń IWGA prezıdenti retindegi sońǵy oıyndary.
— Sport áleminiń ortalyǵyna aınalǵan Chendýda turyp, qoshtasý — men úshin úlken mártebe, — dedi ol.
Infraqurylym men uıymdastyrý
Uıymdastyrýshylar jańa nysandar salýdan bas tartyp, 2023 jylǵy Ýnıversıadadan keıin qalǵan ınfraqurylymdy paıdalandy. Nátıjesinde:
-
18 sport arenasy jańartyldy
-
9 ýaqytsha sport nysany saıabaqtar men kól jaǵalaýlaryna ornalastyryldy
-
Jalpy alǵanda, 27 sport nysany jarystarǵa paıdalanylatyn bolady.
Uıymdastyrý komıtetiniń tóraǵasy, QHR Sport isteri jónindegi memlekettik basqarmasynyń jetekshisi Gao Chjıdan bul oıyndardy qysqa, qaýipsiz jáne áserli ótkizýdi maqsat etkenderin aıtady.
— Ashyqtyq, ınklıýzıvtilik jáne yntymaqtastyq qaǵıdattaryn basshylyqqa ala otyryp, Dúnıejúzilik oıyndardy ótkizý eldegi buqaralyq sportty damytýǵa, sport ındýstrııasyn jedeldetýge jáne kópshilikke sporttyń ıgiligin jetkizýge serpin beredi, — dedi ol.
Buǵan deıin Dımash Qudaıbergen Qytaıdyń Chendý qalasynda ótken jańa jyldyq kontsertte óner kórsetkenin jazǵanbyz.