2025 jylǵa josparlanǵan 600-den astam ınvestıtsııalyq jobanyń 20 paıyzy aıaqtalmaǵan
ASTANA. KAZINFORM — 2025 jyldyń qorytyndysy boıynsha bıýdjet protsesin tsıfrlandyrý áli de iske asyrý satysynda tur. Bul týraly Májilistiń jalpy otyrysynda 2025 jylǵy respýblıkalyq bıýdjettiń atqarylýy týraly esep bergen Joǵary aýdıtorlyq palatanyń tóraǵasy Álıhan Smaıylov aıtty.
— 2025 jyly bıýdjettiń atqarylýy jańa Bıýdjet kodeksiniń qoldanylýy jaǵdaıynda júzege asty. Ákimshilerge keńirek derbestik berildi. Bıýdjet protsesine qatysýshylardyń eseptiligi arttyrylyp, olardyń jaýaptylyǵy jáne parlamenttik baqylaý kúsheıtildi. Joǵary aýdıtorlyq palatanyń qyzmeti de budan tys qalmady. Óz qorytyndymyzda biz memlekettik organdar men kvazımemlekettik sektordyń qyzmetin jańa bıýdjet qaǵıdalary turǵysynan baǵalaýdy júrgizdik, — dedi palata tóraǵasy.
Onyń aıtýynsha, ákimshilerge beretin derbestikti keńeıtý basymdyqtar sapaly aıqyndalǵan, tsıfrlyq turǵydan jetilgen jáne qabyldanatyn sheshimder úshin jaýaptylyq naqty belgilengen kezde iske asyrylýy tıis. Alaıda 2025 jyldyń qorytyndysy boıynsha bıýdjet protsesin tsıfrlandyrý áli de iske asyrý satysynda tur. Respýblıkalyq bıýdjet qarajatynyń qadaǵalanýy bıýdjettiń ekinshi deńgeıine deıin ǵana qamtamasyz etilgen.
— Al olardyń nátıjelilik parametrleri qoldanystaǵy aqparattyq júıelerde qarastyrylmaǵan. Memlekettik organdardyń tsıfrlyq resýrstary tolyq kólemde ıntegratsııalanbaǵan. Jergilikti atqarýshy organdar men ortalyq memlekettik organdardyń derekteri keıbir jaǵdaılarda salystyrýǵa kelmeıdi. Shyǵystarda basymdyq berý problemalary saqtalyp otyr. 2025 jyly 2,4 trln teńge qaıta bólingen. Jekelegen ákimshiler keıbir bıýdjettik baǵdarlamalar boıynsha josparlanǵan kóleminiń 90 paıyzna deıin qaıta bólgen, — dedi ol.
Palata tóraǵasynyń dereginshe, jyl ishinde respýblıkalyq bıýdjetten 75 mlrd teńgeni quraıtyn 99 joba alynyp tastaldy. Aıaqtalýy josparlanǵan 600-den astam ınvestıtsııalyq jobanyń 20 paıyzy aıaqtalmaǵan.
— Tıimsiz paıdalanylǵan qarajat somasy 2024 jylǵy deńgeıden 1,7 esege asyp tústi. Qarajat joǵary deńgeıde ıgerilgenimen, josparlanǵan nátıjelerge qol jetkizilmeýde. Ortalyq deńgeıde bıýdjettik baǵdarlamalar kórsetkishteriniń orta eseppen 5 paıyzyna, al óńirlerde 33 paıyzyna qol jetkizilgen joq. Jalpy, memleket deńgeıinde tsıfrlandyrý, aýyl jáne sý sharýashylyǵy, ekologııa jáne basqa da baǵyttar boıynsha 11 negizgi ulttyq jáne 30-dan astam nysanaly ındıkatorlarǵa qol jetkizilmegeni anyqtaldy, — dedi Álıhan Smaıylov.
Aıta keteıik, Májilistiń jalpy otyrysynda QR Úkimetiniń jáne Joǵary aýdıtorlyq palatanyń 2025 jylǵy respýblıkalyq bıýdjettiń atqarylýy týraly esepteri talqylanyp jatyr.
