2025 jylǵa deıin kolledj stýdentteriniń stıpendııasy eki ese ósedi

2025 jylǵa deıin kolledj stýdentteriniń shákirtaqysy 2 ese ósedi. Bul týraly Úkimet otyrysynda Premer-Mınıstr Álıhan Smaıylov aıtty, dep habarlaıdy Kazinform agenttigi. 

«Damyǵan elderde kadr daıarlaý júıesine, onyń ishinde kásiptik tehnıkalyq bilim berý sapasyn arttyrýǵa basymdyq beriledi. Bul másele Birikken Ulttar Uıymynyń deklaratsııasynda Myńjyldyq damý maqsattary retinde aıqyndalǵan. Jalpy álemdik tájirıbe boıynsha jastardyń eńbek naryǵyna aralasyp, alǵashqy mamandyq alyp shyǵýyna memleket tarapynan kepildik beriledi. Bul rette ekonomıkalyq jetistigi dýaldy oqytý júıesine negizdelgen Germanııa memleketin mysalǵa keltirýge bolady. Bizde 9-synyp túlekterine kolledjde tegin oqýǵa múmkindik berilgen», - dedi Úkimet basshysy.

Onyń atap ótýinshe, 3 jyl ishinde kadr daıarlaýǵa tıisti memlekettik tapsyrys kólemi artty.

Eger buǵan deıin kolledjderde bıýdjet esebinen 95 myń stýdent oqysa, bıyl olardyń sany 133 myńǵa deıin ulǵaıdy.

«Memlekettik tapsyrysty budan ári de arttyra beremiz. Bıyl kolledj stýdentteriniń stıpendııasy 50 paıyzǵa ósti. 2025 jylǵa deıin stıpendııa taǵy 2 ese ósiriledi. «Jas maman» jobasyn iske asyrý aıasynda 180 kolledjdi qaıta jaraqtandyrý úshin respýblıkalyq bıýdjetten 48 mlrd teńge bólindi», - dedi Álıhan Smaıylov.