2025 jylǵa deıin búkil oblys ortalyqtary 5G ınternetpen qamtylýǵa tıis - Prezıdent
Ulttyq statıstıka bıýrosyn naǵyz tsıfrlyq vedomstvoǵa aınaldyratyn mańyzdy reformany júzege asyrý kerek. Bul týraly Digital Bridge 2023 halyqaralyq tehnologııalyq forýmynda Memleket basshysy Qasym-Jomart Toqaev aıtty, dep habarlaıdy Kazinform.
«Ulttyq statıstıka bıýrosyn naǵyz tsıfrlyq vedomstvoǵa aınaldyratyn mańyzdy reformany júzege asyrý kerek. Statıstıkalyq jáne basqa da derekterdi retke keltirý úshin keshendi sharalar qabyldaý qajet. Onyń ishinde basqarý saıasatyn ázirleý, derekterdiń maqsatty arhıtektýrasyn anyqtaý máselesin nazardan tys qaldyrmaǵan jón. Bul memlekettiń tıimdi sheshimder qabyldaýynyń negizgi sharty bolady. 5G jelisin keń kólemde engizý ınnovatsııanyń damýyna tyń serpin beredi. Bul protsess Qazaqstanda qazirdiń ózinde júrip jatyr», - dedi Memleket basshysy.
Prezıdent 2027 jylǵa deıin barlyq oblys ortalyqtaryn uıaly baılanystyń jańa býynymen qamtý mindeti buǵan deıin júktelgenin eske saldy.
«Alaıda tehnologııanyń qaryshtap damý jaǵdaıynda biz de qarqyndy arttyrýymyz kerek. Úkimet bul jumysty merziminen buryn, ıaǵnı 2025 jyldyń sońyna deıin aıaqtaýy qajet. Árıne, merzimniń ózgerýi kórsetiletin qyzmetterdiń sapasyna áser etpeýge tıis. Budan bólek, bul maqsatqa jetý úshin tómengi orbıtadaǵy spýtnıktik júıelerdiń múmkindikterin paıdalana otyryp, shalǵaı aýdan turǵyndaryn ınternetpen qamtamasyz etý mańyzdy. Úkimet bul máseleni jan-jaqty pysyqtaýy kerek. Qajet bolǵan jaǵdaıda zańnamaǵa ózgerister engizýge bolady», - dedi Qasym-Jomart Toqaev.
