2025 jylǵa deıin Astana men Almatyda frantsýz tilindegi mektepter ashylmaq
Oqý-aǵartý mınıstrligi Qazaqstanda frantsýz mektepterin ashý josparyn jarııalady, dep habarlaıdy Kazinform.
«Frantsııa prezıdenti Emmanıýel Makronnyń 2023 jylǵy 1 qarashadaǵy Qazaqstan Respýblıkasyna resmı sapary aıasynda eki el úkimetteri arasyndaǵy halyqaralyq (frantsýz) mektepterdi ashý men Qazaqstan Respýblıkasynyń bilim berý uıymdarynda frantsýz tilin oqytýǵa qatysty kelisimge qol qoıyldy. Qazir Qazaqstan Respýblıkasy Oqý-aǵartý mınıstrligi halyqaralyq mektepterdi ashý týraly Kelisimdi júzege asyrý turǵysynda jumys tobyn qurýdy iske asyryp jatyr. Kelisimge sáıkes 2025 jylǵa deıin Astana men Almaty qalalarynda frantsýz tilinde oqytatyn mektepter ashý josparlanǵan», - delingen mınıstrlktiń Kazinform agenttigine bergen jaýabynda.
Mektepterdegi sabaqtar frantsýz tilinde, sondaı-aq qazaq, orys jáne aǵylshyn tilderinde ótedi. Halyqaralyq mekteptiń bilim berý baǵdarlamasyna engizý úshin mindetti pánder retinde qazaq tili men ádebıeti, Qazaqstan tarıhy jáne geografııa bolady. Qazir mektepterdiń jumys isteýine qatysty basqa da uıymdastyrý máseleleri pysyqtalyp jatyr.
Eske salsaq, bıyl 1 qarashada Astanada Frantsııa prezıdenti Emmanıýel Makronmen kezdesý kezinde Qazaqstan Prezıdenti Qasym-Jomart Toqaev bilim jáne ǵylym salasyndaǵy jobalardy qolǵa alýǵa erekshe kóńil bólingenin atap ótti.
«Elimizde frantsýz mektepterin ashýǵa, frantsýz tilin úıretýge, akademııalyq baılanysty arttyrýǵa baǵyttalǵan birqatar kelisimge qol qoıyldy. Biz muny joǵary baǵalaımyz», - dedi Qasym-Jomart Toqaev.
