2025 jylǵa deıin 32 aýdandyq aýrýhana kúrdeli jóndeýden ótedi
ASTANA. KAZINFORM – Densaýlyq saqtaý mınıstri Aqmaral Álnazarova Úkimet otyrysynda aýdandyq aýrýhanalardy jańǵyrtý jumystarynyń barysy týraly baıandady.
«Óńirler boıynsha aıtsaq, 337 nysanda qurylys bastaldy. 104 nysanda áli bastalǵan joq. Eki óńir boıynsha konkýrstyq rásimder jarııalanǵan joq. Ulytaý oblysynan basqa óńirlerdiń bárinde birlesken qarjylandyrý kózdelgen. Qurylysty ýaqtyly aıaqtaý úshin óńirlerden osy rásimderdi jedeldetip júrgizýdi suraımyz», - dedi mınıstr.
Onyń aıtýynsha, Ulttyq jobaǵa engen 32 aýrýhananyń kóbinde áli jóndeý jumystary bastalmaǵan.
«Ulttyq jobanyń ekinshi mindetiniń aıasynda 32 aýdandyq aýrýhanany jańǵyrtý jumystary júrgizilip jatyr. Búgingi tańda eki aýdandyq aýrýhanany kúrdeli jóndeý jumystary aıaqtaldy. 10 nysanda qurylys júrip jatyr, 5 nysan konkýrstyq rásimderden ótýde. 5 jobaǵa saraptama jasalyp jatyr. Taǵy 8 jobaǵa jobalaý-smetalyq qujattary ázirlenip jatyr. Bul jobalar 2023-25 jyldarǵa arnalǵan», - dedi Aqmaral Álnazarova.
