2025 jylǵa arnalǵan jergilikti bıýdjet shyǵystary 19,3 trln teńgege jetti
ASTANA. KAZINFORM – Bıyl óńirlerdi nyǵaıtýǵa 7,7 trln teńge qarastyrylǵan. Bul týraly elordada Senat janyndaǵy máslıhattarmen ózara is-qımyl jónindegi keńestiń otyrysynda Qarjy mınıstri Mádı Takıev málim etti.
- Óńirlik deńgeıde naqty ekonomıkalyq belsendilik qalyptasyp jatyr, jumys oryndary ashylyp, halyqtyń ómir súrýine qolaıly jaǵdaı qamtamasyz etilip otyr. Bıyl óńirlerdi nyǵaıtýǵa 7,7 trln teńge qarastyrylǵanyn atap ótken jón. Bul kórsetkish Respýblıkalyq bıýdjettiń 30 paıyzyn quraıdy. Jalpy, 2025 jylǵa arnalǵan jergilikti bıýdjet shyǵystary 19,3 trln teńgege jetti. Biraq biz úshin máslıhattardy tek qarjylandyrýmen ǵana emes, sol sııaqty ony paıdalaný jáne baqylaýdyń tıimdi quraldarymen qamtamasyz etý mańyzdy, - dedi M. Takıev.
Mınıstr jyl basynan beri elimizde «Memlekettik satyp alý týraly» jańa Zań kúshine engenin eske saldy. Onyń negizgi maqsaty – satyp alynatyn taýarlardyń, qyzmetterdiń sapasyn arttyrý, rásimderdi jeńildetý jáne olardy odan ári avtomattandyrý. Birinshiden, satyp alý rásimderiniń merzimderi aıtarlyqtaı qysqardy.
- Óńirlerdiń múmkindikteri týraly aıtqanda, salyq júıesin de eskergen jón. Jańa Salyq kodeksiniń jobasy byltyrdan beri Parlamentte talqylanyp jatyr. Jalpy, jobada salyqtardyń, alymdar men tólemderdiń sanyn, sondaı-aq salyq eseptiliginiń sanyn qysqartý sharalary eskerilgen. Tıimsiz salyq jeńildikteri alynyp tastaldy jáne olardyń merzimderi shekteldi. Budan basqa, olardyń tıimdiligine jyl saıyn taldaý júrgiziletin bolady. Bul ne úshin qajet?
Búgingi kúni salyq júktemesin azaıtý úshin iri jáne orta bıznes usaqtalý shemalaryn keńinen qoldanady. Sonyń saldarynan el ishinde jasandy offshorlyq aımaqtar paıda bolyp, jalǵan kompanııalar kóbeıdi, al ekonomıka qomaqty tabysynan aıyrylyp otyr... Sondyqtan salyq reformasy tek salyq jınaýǵa ǵana emes, adal bıznestiń damýy úshin teń jaǵdaılardy qamtamasyz etýge, jergilikti bıýdjetterdi nyǵaıtyp, áleýmettik-ekonomıkalyq damýdyń negizin salatyn tıisti ekonomıkalyq orta jasaýǵa baǵyttalǵan, - dedi vedomstvo basshysy.
Budan buryn habarlanǵandaı, búgingi otyrys barysynda Senat tóraǵasy Máýlen Áshimbaev memleket áleýmettik mindettemelerin tolyq oryndap jatqanyn aıtty.