2025 jyldyń sońynda amerıkalyqtardyń jartysyna jýyǵy qarjylyq qıyndyq kórip otyr

ASTANA. KAZINFORM — Fox News júrgizgen jańa saýalnamaǵa sáıkes, AQSh azamattarynyń shamamen jartysy ınflıatsııa halyqtyń bıýdjetin álsiretip jatqandyqtan, ózderiniń qarjylyq jaǵdaıy nasharlap bara jatyr dep esepteıdi. Bul týraly Kazinform menshikti tilshisi FOX Business-ke silteme jasap habarlaıdy.

Saýalnama nátıjesi kórsetkendeı, respondentterdiń 44 paıyzy ózderiniń qarjylyq jaǵdaıy nasharlap bara jatqanyn aıtqan. Amerıkalyqtardyń aıtýynsha, 2026 jyly olar kóbirek únemdep, az shyǵyndalyp, ınvestıtsııaǵa kóbirek kóńil bólmek.

Sońǵy aılarda ınflıatsııa qarqyny baıaýlaǵanyna qaramastan, kóptegen negizgi taýardyń baǵasy áli de joǵary deńgeıde qalyp otyr. Tutyný baǵalary ındeksiniń derekterine sáıkes, qarasha aıynda jalpy ındeks qyrkúıektegi 3 paıyzben salystyrǵanda 2,7 paıyzǵa ósken. Al jeltoqsan aıyna qatysty derekter áli túpkilikti bekitilmegen.

Buǵan deıin AQSh ekonomıkasy 2025 jyldyń úshinshi toqsanynda jyldyq eseppen 4,3 paıyzǵa óskeni habarlanǵan edi. Bul kórsetkish ekonomısterdiń úshinshi toqsanǵa jasaǵan 3,3 paıyzdyq boljamynan joǵary boldy.

Sonymen qatar, Nıý-Iork Federaldyq rezerv bankiniń jańa esebine sáıkes, 2025 jyldyń úshinshi toqsanynda amerıkalyqtardyń qaryzy 197 mlrd dollarǵa artyp, 18,59 trln dollarǵa jetip, rekordtyq deńgeıge shyqqan.

Budan buryn AQSh Kongresi rekordtyq qorǵanys bıýdjetin qabyldaǵanyn jazǵanbyz.