2025 jyldyń sońyna qaraı Germanııada jumyssyzdardyń sany artty
ASTANA. KAZINFORM — 2025 jyldyń sońyna qaraı Germanııadaǵy jumyssyzdyq ekonomıkalyq jaǵdaıdyń álsizdigine baılanysty ósti, dep habarlaıdy DW.
Nıýrnbergtegi Federaldyq eńbek agenttiginiń málimetinshe, jeltoqsanda jumyssyzdardyń sany 23 myń adamǵa kóbeıdi. Eldegi jalpy jumyssyzdyq deńgeıi 0,1%-ǵa ósip, jyldyń sońynda 6,2%-ǵa jetti.
— Eńbek naryǵyna áli de ekonomıkalyq serpin jetispeıdi. Sondyqtan jyldyń sońyna deıin onyń damýy álsiz bolyp qaldy, — dedi agenttiktiń basshysy Andrea Nales.
2025 jyly Germanııadaǵy jumysqa ornalastyrý jaǵdaıy aıtarlyqtaı nasharlady. Orta eseppen jyl boıyna 2,948 mln adam jumyssyz retinde tirkelgen. Bul 2013 jyldan bergi eń joǵary ortasha jyldyq kórsetkish bolyp otyr. Nalestiń pikirinshe, «biz tómengi deńgeıge jettik» degen sózder dál osy jaǵdaıǵa saı keledi.
Sonymen qatar, kompanııalardyń jańa qyzmetkerlerdi jaldaý suranysy aıtarlyqtaı tómendegen. 2025 jyly Federaldyq eńbek agenttigi orta eseppen 632 myń bos jumys ornyn tirkegen — bul bir jyl burynǵy kórsetkishten 62 myńǵa az.
Agenttik derekteri boıynsha, jańadan jarııalanǵan vakansııalardyń sany sońǵy 25 jyldaǵy eń tómen deńgeıge jetken.
Budan buryn Germanııada memlekettik medıtsınalyq saqtandyrýy bar patsıentter arasynda maman dárigerlerdiń qabyldaýyn uzaq kútýge baılanysty narazylyq kúsheıip kele jatqanyn jazǵanbyz.