2025 jyldyń basynan beri myńnan astam etnıkalyq qazaq qandas mártebesin aldy
ASTANA. KAZINFORM – 2025 jyly 1 070 etnıkalyq qazaq tarıhı Otanymen tabysyp, qandas mártebesin aldy. Jalpy 1991 jyldan beri respýblıkaǵa 1 mln 149 myńnan astam etnıkalyq qazaq oraldy. Bul týraly Eńbek jáne halyqty áleýmettik qorǵaý mınıstrligi habarlady.
Jyl basynan Qazaqstanǵa kelgen qandastardyń jartysynan kóbi (51,9%) – Qytaı Halyq Respýblıkasynan, 37,5% – Ózbekstannan, 7,1% – Túrikmenstannan, 1,8% – Reseıden jáne 1,7% basqa elderden.
2025 jylǵy 1 aqpandaǵy jaǵdaı boıynsha eńbekke qabiletti jastaǵy etnıkalyq qonys aýdarýshylar sany 60,2%-dy, kámeletke tolmaǵandar 32,9%-dy jáne zeınetkerler 6,8%-dy quraıdy.
Eńbekke qabiletti jastaǵy qandastardyń ishinen bilim deńgeıi boıynsha 16,7%-y joǵary bilimdi, 32,9%-y orta kásibı bilimdi, 48,4%-y jalpy orta bilimdi jáne 1,9%-ynyń bilimi joq.
Qonys aýdarǵan etnıkalyq qazaqtar respýblıkanyń túrli óńirlerine qonystandy.
Sonymen birge, qandastardy qonystandyrý úshin mynadaı eńbek kúshi tapshy óńirler anyqtaldy: Aqmola, Abaı, Atyraý, Qostanaı, Pavlodar, Shyǵys Qazaqstan, Batys Qazaqstan jáne Soltústik Qazaqstan oblystary.
Qonystandyrý óńirlerinde 2025 jylǵa arnalǵan qandastardy qabyldaý kvotasy 2 309 adamdy quraıdy. Bıylǵy 1 aqpandaǵy jaǵdaı boıynsha qonystandyrý óńirlerine 171 qandas qonys aýdardy.
Joǵaryda atalǵan óńirlerde qonystanǵan qandastarǵa kóshýge sýbsıdııa túrinde memlekettik qoldaý sharalary usynylady – bir mezgilde otaǵasyna jáne otbasynyń árbir múshesine 70 AEK (275,2 myń teńge) mólsherinde; turǵyn úı jaldaýǵa jáne kommýnaldyq qyzmetterge aqy tóleýge – bir jyl ishinde 15-ten 30 AEK (59-dan 118 myń teńgege deıin) mólsherinde.
Sonymen qatar erikti qonys aýdarýdyń tıimdiligin arttyrý maqsatynda azamattar men qandastardy eńbek kúshi tapshy óńirlerge qonys aýdarýǵa qatysatyn jumys berýshilerdi qoldaý boıynsha ınstıtýtsıonaldyq sharalar qabyldandy. Turǵyn úı satyp alý, salý úshin nemese ıpotekalyq turǵyn úı qaryzdary boıynsha bastapqy jarnanyń bir bóligin jabý úshin ekonomıkalyq utqyrlyq sertıfıkaty turǵyn úı qunynyń 50%-y nemese bir otbasyna 4,56 mln teńgege deıingi mólsherde birjolǵy óteýsiz jáne qaıtarymsyz negizde engizildi.
Buǵan deıin qandastardy qabyldaýdyń 2025 jylǵa arnalǵan óńirlik kvotasy bekitilgenin habarlaǵan edik.