Álemdegi eń úzdik záýlim ǵımarat anyqtaldy
ASTANA. KAZINFORM — 24 eldiń ishinen Brıýsseldegi ZIN in No (o)rd jobasy jeńimpaz atandy, ep jazady AZERTADJ.
Burynǵy ataýy Bıik ǵımarattar jáne qalalyq orta jónindegi keńes (CTBUH) bolǵan Tik ýrbanızm keńesi (Council on Vertical Urbanism, CVU) 2025 jyldyń «Álemdegi eń úzdik bıik ǵımaraty» ataǵyn Brıýssel qalasyndaǵy ZIN in No (o)rd jobasyna berdi. Bul týraly agenttik sheteldik BAQ-tarǵa silteme jasap habarlady.
Kanadanyń Toronto qalasynda ótken Keńestiń jyl saıynǵy halyqaralyq konferentsııasynda resmı habarlandyrý jasaldy. Álemniń túkpir-túkpirinen kelgen jetekshi sáýletshiler, ınjenerler men ýrbanıster 24 elden túsken ótinimderdiń arasynan 111 metrlik ZIN in No (o)rd jobasyn tańdady.
Ol ǵımarat 1970-jyldary salynǵan eski keńse kesheninen qaıta jańartylyp, keńseler, turǵyn úıler, qonaqúı jáne qoǵamdyq oryndar biriktirilgen kóp qyzmetti zamanaýı ǵımaratqa aınaldy. Osylaısha, ol adamdar jumys isteı alatyn, tura alatyn jáne demala alatyn birtutas «tik ekojúıege» aınaldy. Osyndaı tıimdi ári zamanaýı túrlendirýi úshin joba joǵary baǵalandy.
Bastapqyda bul ǵımarat eki bólek munaradan turǵan. Keıin úshinshi bıik qurylys qosylyp, olar bir úlken keshenge biriktirildi. Qaıta jańartý kezinde ǵımaratqa kóp jasyl aımaqtar (aǵashtar, baqtar) qosylyp, energııany az paıdalanatyn zamanaýı tehnologııalar ornatyldy. Sondyqtan bul jaı ǵana ǵımarat emes, eýropalyqtardyń eski úıler men keńselerdi qazirgi zaman talaptaryna saı, ekologııalyq taza ári yńǵaıly etip qaıta jasaý armanynyń naqty úlgisi sanalady.
Sonymen qatar, ǵımarattyń negizgi qurylys bólikteriniń 85%-y — onyń ishinde irgetasy men jerasty qabattary — saqtalǵan. Qurylys materıaldarynyń 60%-nan astamy qaıta qoldanylǵan, ol materıaldar dál sol jerde nemese basqa jobalarda paıdalanylady. Bul tásil parnıktik gazdardyń shyǵaryndylaryn aıtarlyqtaı azaıtyp, Eýropadaǵy úlken kólemdegi qaıta qurý jobalaryna jańa standart ornatýǵa múmkindik berdi.
Budan buryn CNN Travel Almatyny álemdegi eń úzdik týrıstik baǵyttardyń biri retinde atady.