2025 jyldyń 7 aıynda Qazaqstannyń JІÓ ósimi 6,3% boldy

ASTANA. KAZINFORM – Ulttyq statıstıka bıýrosynyń aldyn ala derekterine sáıkes, 2025 jyldyń qańtar–shilde aılarynda Qazaqstannyń jalpy ishki ónimi (JІÓ) byltyrǵy sáıkes kezeńmen salystyrǵanda 6,3%-ǵa ósken. Bul týraly Ulttyq ekonomıka mınıstrliginiń baspasóz qyzmeti habarlady. 

Taýar óndirý kólemi 8,3%-ǵa, qyzmetter 5,2%-ǵa (bul rette eń qarqyndy segment kólik pen saýda bolyp otyr), ónerkásip 6,9%-ǵa artty.

JІÓ-niń ósýine eń kóp úles qosqan salalar: kólik jáne qoıma – 22,5%, qurylys – 18,5%, kóterme jáne bólshek saýda – 8,6%, taý-ken ónerkásibi – 8,5%, óńdeý ónerkásibi – 6,1%.

Kólik jáne qoıma salasyndaǵy qyzmet kólemi temirjol, qubyr jelileri jáne avtomobıl kóligimen júk tasymaly kóleminiń joǵary bolýyna baılanysty 22,5%-ǵa ósti.

Qurylys salasynda jumys kólemi 18,5%-ǵa artty (2025 jyldyń qańtar–maýsymyndaǵy 18,4%-ben salystyrǵanda). Túrkistan oblysynda (+34,6%) mektepter, temirjol jelileri jáne avtojoldar qurylysy, Aqtóbe oblysynda (+25,6%) jaıly mektepter qurylysy men joldardy rekonstrýktsııalaý, Jambyl oblysynda (+13,1%) jáne Shyǵys Qazaqstan oblysynda (+5,9%) turǵyn úıler, medıtsınalyq nysandar jáne elektr jelilerin salý jobalaryn júzege asyrýǵa baılanysty joǵary ósim tirkelip otyr.

Saýda 8,6%-ǵa ósti (2025 jyldyń qańtar–maýsymynda 8,4%). Esepti kezeńde kóterme saýda 9,5%-ǵa ósip, jalpy ósimniń 66%-dan astamyn qamtydy, bólshek saýda 6,6%-ǵa artty. Aıtarlyqtaı dınamıka Qostanaı oblysynda (+17,6%), Soltústik Qazaqstan oblysynda (+12%) jáne Astanada (+9,2%) baıqaldy, munda astyq, agrohımııa, azyq-túlik, otyn, farmatsevtıka ónimderin jáne tehnıka satý kórsetkishteri qarqyndy túrde ósip keledi.

Ónerkásip óndirisindegi ósim – 6,9%. Elimizdiń barlyq óńirinde ósim baıqaldy, biraq dınamıka boıynsha kóshbasshylar – Jambyl oblysy (+18,2%), Soltústik Qazaqstan oblysy (+14,9%), Shymkent (+15,8%) jáne Almaty (+13,5%), sondaı-aq Túrkistan oblysy (+12,3%).

Óńdeý ónerkásibindegi ósimdi (6,1%) mashına jasaý (+14%), azyq-túlik (+9,2%), munaı ónimderi (+8,6%), hımııa ónerkásibi (+6%) jáne metallýrgııa (+1,3%) kórsetip otyr.

Aýyl, orman jáne balyq sharýashylyqtaryndaǵy óndiris kólemi 3,7% deńgeıinde saqtaldy. Mal sharýashylyǵyndaǵy ósim sút (+6,1%), mal, qus bordaqylaý (+2,1%) jáne jumyrtqa (+0,9%) esebinen 3,4%-ǵa jetti.

Úkimet ekonomıkadaǵy negizgi salalardy qoldaýǵa, ony ártaraptandyrýǵa jáne ınvestıtsııalyq belsendilikti yntalandyrýǵa erekshe nazar aýdara otyryp, ekonomıkanyń turaqty ósimin qamtamasyz etý jónindegi Prezıdenttiń tapsyrmalaryn júzege asyrý barysyn baqylaýda ustap otyr.