2025 jyldan bastap tek tirkelgen tulǵalar ǵana adam tasymaldaı alady
ASTANA. KAZINFORM – Zańsyz avtotasymaldaýshylarmen kúres qarqyndy júrgizilip jatyr. 2025 jyldan bastap jeke agregatorlar jeke tasymaldaýshy retinde tirkelgen tulǵalarǵa ǵana tapsyrys beretin bolady. Bul týraly QR ІІM Ákimshilik polıtsııa komıtetiniń tóraǵasy Qaısar Sultanbaev aıtty.
«2025 jyldan bastap jeke agregatorlar jeke tasymaldaýshy retinde tirkelgen tulǵalarǵa ǵana tapsyrys beretin bolady. Óz kezeginde jeke tasymaldaýshylar kúndelikti reıs aldyndaǵy jáne reısten keıingi medıtsınalyq tekserýden ótýge, avtokólikti kúndelikti tehnıkalyq baıqaýdan ótkizýge, sol jaqtan basqarylatyn avtokólikterdi paıdalanýǵa, júrgizýshilerdiń eńbek jáne demalys rejımin saqtaýǵa mindetti bolady. Kórsetilgen talap oryndalmaǵan jaǵdaıda ınternet agregatorlardyń ıeleri jeke tasymaldaýshyǵa tapsyrys bermeýge mindetti», - dedi Ákimshilik polıtsııa komıtetiniń tóraǵasy OKQ alańynda ótken baspasóz máslıhatynda.
Sondaı-aq Qaısar Sultanbaev Kólik mınıstrligimen birlesip osyndaı tasymal túrin júzege asyrý úshin óz baǵdarlamalaryn usynatyn kompanııalarmen memorandýmdar jasalǵanyn atap ótti. Memorandým aıasynda júrgizýshiler eńbek jáne demalys rejımin saqtaýyna, medıtsınalyq tekserýden ótýine, jolaýshylar men bagajdy tasymaldaý erejelerine qoıylatyn talaptar kúsheıtiletin bolady. Internet agregatorlar osy kezde qosymshalardyń jumysyn pysyqtap jatyr.
Aıta keteıik, jyl basynan beri elimizde 22 myńnan astam jol apaty tirkelip, onda 2 myń adam qaza boldy.
Sondaı-aq, aǵymdaǵy jyly 21 myńǵa jýyq mas júrgizýshi ustalǵan.
