2025 qorytyndysy: Mádenıet salasyndaǵy aıtýly oqıǵalar
ASTANA. KAZINFORM — 2025 jyl Qazaqstannyń mádenıet salasy úshin mazmundy da maǵynaly kezeń atandy jáne óner, ádebıet, teatr men kreatıvti ındýstrııa úshin jańashyldyqtarǵa toly boldy. Qazaqstan mádenıeti halyqaralyq keńistikte jańa deńgeıde tanyldy. Abaıdyń 180 jyldyq mereıtoıy elimizde ǵana emes, shet elderde de toılandy. Elimizge “A” sanatyna jatatyn álemdik pop juldyzdar kelip, Nıý-Iork fılm akademııasynyń úshinshi fılıaly ashyldy. Kınoprokatta da otandyq fılmder mıllıard teńgeden astam tabys taba bastady. Kazinform agenttigi 2025 jyly elimizde ótken aıtýly mádenı oqıǵalarǵa sholýyn usynady.
Fonogrammany shekteý, LGBT nasıhatyna tyıym — Jańa zańdar
2025 jylǵy Parlament mádenıet salasyna qatysty birqatar zańdar men ózgertýler qabyldady. 10 aqpanda Memleket basshysy mádenıet, bilim berý jáne tálimgerlik máseleleri boıynsha zańǵa qol qoıdy. Zań memlekettik tildiń qoldanylýyn keńeıtýge, onyń mártebesin nyǵaıtýǵa, mádenı baǵdarlamalardy iske asyrýdyń quqyqtyq bazasyn jańartýǵa, materıaldyq emes mádenı murany qorǵaýǵa baǵyttalǵan.
Sondaı-aq, naýryz aıynda Prezıdent Túrkistan qalasynyń tarıhı-mádenı jáne týrıstik ortalyq retinde arnaıy mártebesin beretin zańǵa qol qoıdy. Bul zań qaladaǵy tarıhı, mádenı murany, onyń ishinde Qoja Ahmet ıAsaýı kesenesin saqtaý, qalpyna keltirý jáne damytýǵa baǵyttalǵan. Zań aıasynda tarıhı jáne arheologııalyq eskertkishterdi saqtaý men qorǵaý kúsheıtildi. Ulttyq qolónerdi jandandyrý men qoldaý sharalary belgilendi. Arheologııalyq qoryq uıymdastyrý sharalary qarastyryldy.
26 jeltoqsanda Memleket basshysy tarıhı-mádenı mura obektilerin qorǵaý jáne bilim berý-saýyqtyrý qyzmetteri máseleleri jóninde zańǵa qol qoıdy. Bul qujat arheologııalyq qyzmetti júıeleýge jáne tarıhı-mádenı mura nysandaryn saqtaý kepildigin qamtamasyz etýge baǵyttalǵan. Ásirese, arheologııalyq jumystar boıynsha biryńǵaı avtomattandyrylǵan aqparattyq júıe qurý; arheologııalyq oljalar men materıaldardy tabystaý, Ulttyq depozıtarıı qurý qarastyrylǵan.
Qarasha aıynda Parlament fonogramma paıdalanýdy shekteý týraly zańdy qabyldady. Atap aıtqanda, bul norma kontserttik oıyn-saýyq mádenı-buqaralyq is-sharalarǵa qatysty, ıaǵnı 200 kórermennen astam is-sharalarda fonogramma paıdalanýǵa tyıym salynady. Degenmen, kósheler men alańdarda, ıppodrom sııaqty nysandarda fonogrammaǵa tyıym salynbaıdy. Biraq, osyǵan qatysty uıymdastyrýshylar tıisti habarlama jasaýǵa mindetteledi. Munymen qosa, televızııalyq jazbalar kezinde fonogrammaǵa ruqsat beriledi.
Ázirge Májilis kreatıvti ındýstrııany qoldaý men damytýǵa baǵyttalǵan Zańdy qabyldady. Onda «Kreatıvti ındýstrııa qyzmetkeri» jáne «kreatıvti ındýstrııa sýbektileriniń tizilimi» uǵymdary engiziledi. Ákimdikterge kreatıvti ındýstrııalar salasyndaǵy kásipkerlikti damytý arqyly áleýetti ashý jáne talanttardy damytý úshin jaǵdaı jasaý quzyreti beriledi. Kreatıvti ındýstrııa qyzmetkerleriniń quqyqtaryn qorǵaý jónindegi normalar paıda bolady.
Sondaı-aq, Senat «QR keıbir zańnamalyq aktilerine arhıv isi jáne quqyqqa qaıshy kontenttiń taralýyn shekteý máseleleri boıynsha ózgerister men tolyqtyrýlar engizý týraly» Zańdy eki oqylymda qarap, maquldady. Onda arhıvterge «Ulttyq» mártebe berý, aýylda jumys isteıtin arhıv qyzmetkerlerine qosymsha aqy tóleý jáne óskeleń urpaqty dástúrli emes jynystyq qatynastar men pedofılııany nasıhattaýdan qorǵaý qarastyrylǵan.
Álemdik juldyzdar kontserti
Qazaqstan úshin ǵana emes, tutas Ortalyq Azııa úshin jyldyń basty mádenı jańalyǵy — Djennıfer Lopes, Backstreet Boys toby sekildi álemge tanymal pop-juldyzdardyń Almaty men Astanada ótkizgen kontserti boldy.
Eń aldymen Djennıfer Lopestiń kelýi Astananyń A-klasty juldyzdardyń gastroldik kartasyna enýine jol ashty. 1 tamyz kúni «Astana Arena» stadıonyndaǵy kontsertke 25 myńnan astam bılet, Almatydaǵy kontsertke 27 myń bılet satylǵan. Olardyń arasynda alys-jaqyn 30-ǵa jýyq elden kelgen 7 myńǵa jýyq sheteldik týrıst boldy.
Sonymen birge, ańyzǵa aınalǵan amerıkalyq Backstreet Boys toby alǵash ret Qazaqstanda kontsert qoıdy. Astanadaǵy kontsertke Germanııa, Polsha, Frantsııa, Túrkııa, Fınlıandııa, Lıtva, Estonııa, Chehııa, Serbııa, Grekııa, Ázerbaıjan, Reseı, Ózbekstan jáne taǵy basqa 45 elden 12 myńnan astam týrıst kelgen. Tipti Djennıfer Lopes pen Backstreet Boys kontsertteri Astana men Almatydaǵy meıramhana, dámhanalardyń saýdasyn 11 paıyzǵa deıin arttyrǵan.
— Aldaǵy 3 jylda «A» sanatyndaǵy 10-nan astam kontsert ótkizemiz, bul protsess qazirdiń ózinde bastalyp ketti. Kontsertterdi uıymdastyratyn kompanııalar 1 mıllıard teńgeden astam salyq tóleıdi, — deıdi prodıýser Málik Hasenov.
Sondaı-aq bıyl 28 qazanda álemge áıgili ıtalııalyq opera ánshisi Andrea Bochellı Almatydaǵy Almaty Arena stadıonynda úlken kontsert ótkizdi. Bul onyń 2025 jylǵy álemdik týrynyń bir kontserti boldy.
Qyrkúıek aıynda Park Live Almaty mýzykalyq festıvalinde Robbie Williams, Marilyn Manson, Röyksopp, Alan Walker, Morcheeba, The Hu, Shortparis, Swae Lee, Elderbrook jáne Bloodywood sııaqty álemdik juldyzdar óner kórsetti.
Silk Way Star baıqaýyn 1 mıllıard kórermen tamashalady
Bıyl Jibek Joly telearnasynda 12 eldiń ónerpazyn biriktirgen Azııanyń alǵashqy vokaldyq mega-jobasy — Silk Way Star baıqaýy ótti. Mıllıondaǵan kórermen jınaǵan Silk Way Star megajobasy QR Prezıdenti Teleradıokesheni men Qytaıdyń China Media Group medıakorporatsııasy arasyndaǵy kelisim aıasynda ótti. Dúnıe júzindegi mıllıondaǵan kórermen jobany baqylap, ár eldiń mýzykalyq murasyn tanydy. Jobany bir mıllıard kórermen tamashalady.
Baıqaýǵa Ázerbaıjan, Armenııa, Grýzııa, Qazaqstan, Qytaı, Qyrǵyzstan, Malaızııa, Mońǵolııa, Tájikstan, Túrikmenstan, Ózbekstan jáne Ońtústik Koreıadan kelgen ártister qatysty. Qazaqstan namysyn belgili ánshi ALEM (Batyrhan Málikov) qorǵady. Ol k-pop janrynda koreı tilinde «Come back home» ánin, sıntı-pop janrynda ańyzǵa aınalǵan «Take on Me» ánin, rok stılinde 6ELLUCCI tobynyń «Qara» týyndysyn oryndap, dıapazonynyń keńdigi, sahnadaǵy erkindigi jáne emotsııany dál jetkize alýy arqyly jobadaǵy favorıt qatysýshynyń birine aınaldy.
Grand-fınalda Mońǵolııa ókili, jeńimpaz dástúrli ýrtyn-dýýdy zamanaýı mýzykalyq janrlarmen úılestiretin tanymal ánshi jáne kompozıtor Mıshel Djozef jeńiske jetti. Endi baıqaýdyń kelesi maýsymy Qytaıda ótedi. Konkýrsqa qatysýǵa nıet bildirgen elder qatary da artyp keledi. Indonezııa, Úndistan, Pákistan, Vetnam, sondaı-aq birneshe arab memleketteri jobaǵa qosylýǵa qyzyǵýshylyq tanytqan.
Djekı Chan Mańǵystaýda fılm túsiredi
Mańǵystaý oblysynda aty ańyzǵa aınalǵan Djekı Channyń qatysýymen fılm túsiriledi. «Qudiretti saýyt» («Armour of God») jobasynyń toby Aqtaýǵa kelip, tabıǵı lokatsııalardy qaraǵan. Uzaq kelissóz nátıjesinde biregeı landshafttary, aýqymdy panoramalary jáne tabıǵı ereksheligi úshin «Qudiretti saýyt» fılminiń túsirilim orny retinde dál Mańǵystaý tańdaldy. Al rejısser retinde Robert Kýndy Djekı Channyń ózi bekitken.
Jobany uıymdastyrýshylardyń habarlaýynsha, bul sheshim Beıjińdegi kelissózderden keıin qabyldanǵan. Kýltke aınalǵan fılmniń Mańǵystaýda túsirilýi Qazaqstannyń kınoındýstrııasy úshin mańyzdy oqıǵa retinde baǵalanyp otyr. Jobanyń júzege asyrylýy elimizdiń halyqaralyq kınematografııalyq keńistiktegi ornyn nyǵaıtyp, óńirge ınvestıtsııalar tartýǵa, sondaı-aq kreatıvti ındýstrııalar men týrızm áleýetin damytýǵa yqpal etedi.
Aıta keteıik, «Qudiretti saýyt» franshızasy alǵash ret 1986 jyly jaryq kórdi. Ekshn men shyǵys komedııasyn úılestirgen týyndy Djekı Chandy álemdik juldyzǵa aınaldyrdy.
Aqtaý – Túrki áleminiń mádenı astanasy
Bıyl TÚRKSOI Túrki mádenıeti men ónerin damytý jónindegi halyqaralyq uıym Aqtaý qalasyn “Túrki áleminiń mádenı astanasy” dep jarııalady. Joba aıasyndaǵy is-sharalar jyl boıy jalǵasty. Osy aralyqta túrkitildes memleketter arasyndaǵy baýyrlastyq baılanystar men dostyqty, túrkilik mádenıet pen ónerdi urpaqtan-urpaqqa jetkizip, álemge tanytý maqsatynda túrkitildes memleketter ónerpazdarynyń qatysýymen kóptegen mádenı is-shara qolǵa alyndy.
Kaspıı teńiziniń jaǵalaýynda ótken jyldyń ashylý saltanatyna 25 adam jınaldy. Buryn-sońdy bolmaǵan halyqaralyq deńgeıdegi mádenı sharaǵa Dımash Qudaıbergen arnaıy qatysty. Arǵyqazaq mıfologııasyna qurylǵan «Sýyn aıǵyr» aýyly ashylyp, mıfolog ǵalym Serikbol Qondybaıdyń memorıaldyq mýzeıiniń negizgi jádigerleri qoıyldy. «Túrki áleminiń totemi» halyqaralyq konferentsııasy, «Qyrymnyń qyryq batyry» jyryna arnalǵan túrki epostarynyń sherý-festıvali, «Kaspıı – dostyq teńizi» vokaldy-ınstrýmentaldy ansamblderi festıvali men Túrki elderiniń folklorlyq ansamblderi jáne aspapta oryndaýshylarynyń festıvali ótti.
Sonymen birge, «AQ MAıA FEST» shubat festıvali, «Jumbaq boıaýlar» halyqaralyq sýretshiler men músinshiler sımpozıýmy jáne XXV «TÚRKSOI sýretshileriniń májilisi», Abaı Qunanbaıulynyń 180 jyldyǵy aıasynda jas aqyndar arasyndaǵy «Túrki shaıyrlary» І halyqaralyq poezııa festıvali boldy.
«XXI ǵasyrdyń mýzykalyq qubylysy»: Dımash álemdik týrne jasady
2025 jyl qazaqstandyq ánshi Dımash Qudaıbergenniń óneri men halyqaralyq bedelin jańa belesterge shyǵarǵan mańyzdy kezeń boldy. Bıyl ol óziniń álemdik “Stranger” týrymen keń kólemdi gastroldik sapar uıymdastyryp, Madison Square Garden (Nıý-Iork) sııaqty áıgili arenada jeke kontsert bergen alǵashqy qazaqstandyq atandy. Dımashtyń týry London, Barselona, Mehıko, Rıga sııaqty basqa da iri qalalarda ótti.
Sonymen birge Dımash halyqaralyq gýmanıtarlyq qyzmette belsendi ról atqardy — 2025 jyly ol BUU Halyqaralyq kóshi-qon uıymynyń (IOM) Jahandyq izgi nıet elshisi atandy. 22 shildede Dımash Qudaıbergen Qyrǵyzstannyń halyq ártisi ataǵyn aldy. Al Vetnamdaǵy buqaralyq aqparat quraldary Hanoıda ótetin 8WONDER Winter 2025 festıvalinde óner kórsetken Dımash Qudaıbergen týraly “Sırek kezdesetin jahut” dep sıpattap jazdy.
Jeke shyǵarmashylyqta da tyń bastamalary bar: Dımash Sáken Seıfýllınniń «Taý ishinde» ánine jańa dem berip, áleýmettik jelide jankúıerler arasynda chellendj uıymdastyrdy. Oǵan qosa, ánshiniń shyǵarmashylyq jolyna arnalǵan «Dımash Qudaıbergen: Sheksiz mýzyka» atty kitap-albomdy kópshilik nazaryna usynyldy.
Almaty mańynda New York Film academy fılıaly ashyldy
Almaty oblysynyń Qaskeleń qalasynda álemge áıgili amerıkalyq kıno mektebi – New York Film Academy fılıalynyń resmı ashylý rásimi ótti. Bul – AQSh-tan tys úshinshi NYFA kampýsy jáne Qazaqstanda ashylǵan álemdik deńgeıdegi alǵashqy shyǵarmashylyq ýnıversıtet.
Fılıalda AQSh-tan arnaıy keletin NYFA kásibı dáriskerleri bir jyldyq jáne qysqa merzimdi oqý baǵdarlamalary aıasynda bes baǵyt boıynsha bilim beredi: Kıno (Filmmaking); Prodıýserlik etý (Producing); Stsenarıılik is (Screenwriting); Anımatsııalaý jáne vızýaldy áserler (3D animation & VFX); Oıyn ázirleý (Game design).
Akademııanyń alǵashqy qabyldaýyna Qazaqstannan jáne óńirdiń kórshi elderinen (Qytaı, Úndistan, Reseı) 200 stýdent qabyldandy. Oqýdy bitirgennen keıin túlekter Amerıka ýnıversıtetiniń dıplomdaryn jáne Nıý-Iorkte nemese Los-Andjeleste oqýyn jalǵastyra alady.
Almaty Museum of Arts — Almatydaǵy jańa óner mýzeıi
2025 jyly 12 qyrkúıekte Almatyda Almaty Museum of Arts (ALMA) ashyldy. Bul Ortalyq Azııadaǵy eń iri zamanaýı ónerge arnalǵan mýzeılerdiń biri. Mýzeıdiń mıssııasy – zamanaýı óner úderisterin qoldaý jáne zertteý, olardyń álemdik mádenıettegi mańyzyn ashý. Mýzeı qoryna Qazaqstannan jáne basqa da elderden jınalǵan 700 óner týyndysy endi.
Jalpy aýmaǵy 10 myń m²-den asatyn mýzeı ǵımaratyn brıtandyq Chapman Taylor sáýlet bıýrosy jobalaǵan. Birinshi qabatta keń kórme zaldary ornalasqan, sonyń ishinde «Uly dala» jáne «Saryarqa» zaldary bar. Ortalyq keńistik Art Street atrıýmyna berilgen, ol Sharyn shatqalynyń tabıǵı pishinderin beıneleıdi. Sondaı-aq munda kásibı qor saqtaý orny, restavratsııalyq ortalyq jáne «Sheberhana» atty kreatıvti keńistik ornalasqan.
Mýzeı kollektsııasynyń 70%-dan astamy HH ǵasyrdyń kórnekti qazaqstandyq sýretshilerdiń eńbeginen turady. Atap aıtsaq, Jańataı Shárdenov, Toqbolat Toǵyzbaev, Maqym Qısamedınov jáne Shaımardan Sarıevtiń shyǵarmalary qoıylǵan. Sondaı-aq qazaqstandyq zamanaýı ónerdiń negizgi tulǵalary atanǵan Rústem Halfın, Saýle Súleımenova jáne Saıd Atabekovtiń jumystary da bar. Bolashaqta mýzeı óz kollektsııasyn tolyqtyryp, maqsatyn jalǵastyra bermek.
Mıllıardtap tabys tapqan fılmder kóbeıdi
Bıyl memlekettiń qoldaýmen Kıno ortalyǵy arqyly 15 kınojoba túsirilimge jiberilgen. Olardyń ishinde 8 kórkem fılm («Aqjeleń», «Búrkitshi», «Dnı», «Kenjem qaıda?», «38», «Trevojnaıa noch», «Saǵyndym seni», «Muǵalim»), 2 derekti fılm («Venera. Baladan – baq, qamystan – qut», «Batyl bol») jáne 3 anımatsııalyq fılm («Adamzatqa izdeý salamyn», «Jibek», «Komanda A.») bar.
Oǵan qosa, qazaqstandyq kınoındýstrııa qarqyndy damyp, jyl saıyn kassalyq túsimderdiń jańa rekordtary ornap keledi. Otandyq fılmder bir-birimen básekege túsip, sheteldik kartınalardy artta qaldyryp júr.
Kinomania.kz saıtynyń málimetinshe, qazaqstandyq kıno tarıhynda 17 kommertsııalyq fılm mıllıard teńgeden astam kassalyq túsim jınaǵan. Al 2025 jyly aktrısa Darıǵa Badyqovanyń “Ystyq uıa” dramasy 1 754 600 300 teńge jınasa, polıtseıler ómiri týraly “Patrýl. Sońǵy buıryq” týyndysy — 1 727 008 730 teńge, “Molda” komedııasy — 1 558 337 191 teńge, “Qolyńnan kelse alyp qash” komedııasy — 1 402 320 000 teńge tabys tapqan.
Abaıdyń 180 jyldyǵy 10 kún boıy toılandy
Bıyl uly oıshyl, aqyn Abaıdyń 180 jyldyq mereıtoıy Semeı óńirinde tuńǵysh ret 10 kún boıy atalyp ótildi. Mereıtoı kezinde mádenı-rýhanı, tanymdyq, ıntellektýaldyq is-sharalarǵa basymdyq berildi. Halyqaralyq, respýblıkalyq jáne óńirlik deńgeıde 100-den astam aýqymdy is-shara uıymdastyryldy. «ABAI AKADEMIASY» atty entsıklopedııalyq portal iske qosylyp, Abaı murasy tsıfrly keńistikke jol ashty. Túrkistan oblysynyń mádenı kúnderi aıasynda aýyl sharýashylyǵy ónimderiniń jármeńkesi, qolóner sheberleriniń kórmesi jáne ónerpazdardyń kontserti uıymdastyryldy.
Aýqymdy sharany uıymdastyrýǵa júzdegen mádenıet qyzmetkeri, aspaz, tehnıkalyq mamandar, 500-den astam volonter jáne aýdannan kelgen ardagerler, salt-dástúr bilgirleri jumyldyryldy. 1-10 tamyz aralyǵynda 70-ten astam iri mádenı is-shara, 25 kontserttik baǵdarlama, 10 teatrlandyrylǵan qoıylym, 8 kórme men festıval, 5 sporttyq jarys, 5 respýblıkalyq jáne halyqaralyq shyǵarmashylyq joba qamtyldy.
10 tamyzda Abaı aýdanynda ótken aqynnyń 180 jyldyǵyna arnalǵan mereıtoılyq sharalarǵa 50 myńnan astam adam jınaldy. Onyń ishinde 15 elden sheteldik delegatsııalar, ǵylymı jáne shyǵarmashylyq zııaly qaýym, óner ıeleri, jastar, týrıster men BAQ ókilderi boldy. Abaı aýdanynda 200-den astam kıiz úı tigildi. «Abaı-Shákárim» kesenesi aýmaǵynda «Jıdebaı» etnoaýyly boı kóterdi. Sonymen qatar Jıdebaı men Bórilide antenna-dińgekti qurylǵy ornatylyp, ınternet qosyldy. Osylaısha, Abaı toıy qarsańynda Abaı aýdany 100 paıyz ınternetpen qamtyldy.
Sonymen birge, bıyl uly aqyn ári «Alash» qozǵalysynyń qaıratkeri Mirjaqyp Dýlatulynyń týǵanyna 140 jyl, dańqty qolbasshy, jazýshy Baýyrjan Momyshulynyń týǵanyna 115 jyl, aqyn Juban Moldaǵalıevtiń týǵanyna 105 jyl, jazýshy Qýandyq Shańǵytbaevtyń týǵanyna 100 jyl, Qadyr Myrza Áli men Jumeken Nájimedenovtyń týǵanyna 90 jyl, Eskendir Hasanǵalıev pen Farıza Ońǵarsynovanyń týǵanyna 85 jyl toldy. Al Nurǵısa Tilendıevtiń 100 jyldyq mereıtoıy ıÝNESKO deńgeıinde toılandy.
Mańǵystaýda Beket ata Myrzaǵululynyń 275 jyldyǵy, Aqtóbede — Keńes Odaǵynyń batyry Álııa Moldaǵulovanyń 100 jyldyǵy, Ertis-Baıan óńirinde — Jaıaý Musanyń 190, Maıranyń 135, Isa Baızaqovtyń 125 jyldyǵy atap ótildi. Ereımentaý halqy úsh birdeı tarıhı tulǵaǵa as berdi — bıyl Qanjyǵaly Bógenbaıdyń týǵanyna 345 jyl, Saqqulaq bıdiń týǵanyna 225 jyl, Sádýaqas Ǵylmanıdiń týǵanyna 135 jyl toldy.
Halyqaralyq mádenı qatynastar
Qazaqstan 2025 jyly mádenı dıplomatııany belsendi júrgizdi, álemniń birqatar elinde halyqaralyq týrızm jáne mádenıet festıvalderinde qatysty. Máselen, Qytaıdyń Beıjiń qalasynda Qazaqstannyń mádenıet ortalyǵy ashyldy. Ortalyq óner, til jáne mádenı almasýǵa jáne elimizdiń murasyn tanystyrýǵa arnalǵan eń iri alańǵa aınaldy. Ortalyq 2000-nan astam adamdy qabyldap úlgerdi. Mádenıet alańy kórme, bilim berý jáne aǵartýshylyq baǵytta jumys isteıdi. Bul Memleket basshysynyń Qazaqstannyń mádenı dıplomatııasyn nyǵaıtý jónindegi tapsyrmalaryna tolyq saı keledi.
Abaıdyń 180 jyldyǵyna oraı Rım qalasynda uly aqynnyń eskertkishi ornatyldy. Bul mańyzdy oqıǵa Italııa halqynyń nazaryn aýdaryp, Qazaqstan men Eýropa arasyndaǵy mádenı baılanysty nyǵaıtty. Qyrǵyzstannyń Osh qalasynda Abaı atyndaǵy kóshe, eskertkish jáne mýzeı ashyldy. Bul – elderimiz arasyndaǵy berik baılanys pen qazaq oıshylynyń ortaq mádenı tarıhtaǵy orynyn aıshyqtaıdy.
Sondaı-aq Armenııadaǵy Qazaqstan mádenıeti kúnderi aıasynda Erevan qalasynda Abaı Qunanbaıuly atyndaǵy saıabaqtyń saltanatty ashylýy ótti. Bul oqıǵa Prezıdentimizdiń Erevanǵa jasaǵan resmı sapary barysynda memleket basshylary deńgeıinde jasalǵan kelisimderdiń nátıjesinde júzege asty.
Tamyz aıynda Qazaqstan men Qyrǵyzstan prezıdentteri qatysqan Muhtar Áýezov pen Shyńǵys Aıtmatovqa arnalǵan eskertkishtiń ashylýy ótti. Eskertkish Qazaqstan men Qyrǵyzstan arasyndaǵy rýhanı jáne ádebı birliktiń sımvolyna aınaldy.
Sondaı-aq bıyl Armenııa men Reseıde Qazaqstannyń mádenı kúnderi ótti. Al Qazaqstanda Vetnam halqynyń mádenı kúnderi uıymdastyryldy. Mundaı is-sharalar halyqaralyq mádenı kommýnıkatsııany nyǵaıtyp, eldiń shyǵarmashylyq jobalarǵa degen qyzyǵýshylyǵyn arttyrýǵa yqpal etedi.
Buǵan deıin qazaq dıplomatııasynyń jańa dáýiri, halyqaralyq arenadaǵy tabystar men syn-qaterler týraly jyl qorytyndysyn jarııalaǵan edik.
Sondaı-aq, 2025 jyly álemdi ózgertken adamdar men oqıǵalar týraly Kazinform reıtıngi jaryq kórdi.