2025-2027 jyldar aralyǵynda qaldyqtardy suryptaý jáne qaıta óńdeý jobalary iske asyrylmaq

ASTANA. KAZINFORM – Qazaqstanda ekologııalyq mádenıetti damytý 2024-2029 jyldar kezeńinde úsh baǵyt boıynsha júzege asyrylady. Birinshi baǵyt aıasynda 2025-2027 jyldar aralyǵynda qaldyqtardy suryptaý jáne qaıta óńdeý boıynsha jobalar iske asyrylmaq. Bul týraly Ekologııa jáne tabıǵı resýrstar vıtse-mınıstri Jomart Álıev málimdedi. 

«2025-2027 jyldar aralyǵynda qaldyqtardy suryptaý jáne qaıta óńdeý boıynsha jobalar iske asyrylady. Bul qoqystardy kómý kólemin qysqartýǵa jáne qaıta óńdeý úlesin arttyrýǵa múmkindik beredi», - dedi spıker.

Sondaı-aq vıtse-mınıstr kósheler men aýlalardyń, qoǵamdyq keńistiktiń jáne jalpy qorshaǵan ortanyń jaı-kúıin baqylaýdy uıymdastyrý kezinde tsıfrlandyrý, buzýshylardy anyqtaýǵa jáne ákimshilik sharalardy qoldanbas buryn beınemonıtorıngtik júıeniń múmkindikteri paıdalanylatynyn atap ótti. 

Bul rette azamattar men kásiporyndar tarapynan ekologııalyq quqyq buzýshylyqtardy azaıtý maqsatynda tirkeýge arnalǵan kameralar sany ulǵaıtylmaq. Odan bólek, memlekettik qurylymdar, bıznes uıymdar, qoǵamdyq birlestikter, BAQ jáne bilim berý mekemeleri sııaqty túrli qatysýshylardy tartý arqyly aqparatpen tıimdi almasýǵa arnalǵan jáne azamattar ekologııalyq bastamalarǵa belsendi qatysatyn platforma ázirlenetini aıtyldy. Ekologııalyq mádenıetti jaqsartý úshin ekologııalyq jaýapty minez-qulyqty nasıhattaıtyn ınflıýenserler men blogerler tartylady.

Aıta keteıik, buǵan deıin elimizde «Taza Qazaqstan» ekologııalyq mádenıetin damytý tujyrymdamasy bekitiletinin habarlaǵan edik.