«QazaqGaz» aldaǵy jylytý maýsymyna tehnıkalyq daıyndyqty kúsheıtýde
ASTANA. KAZINFORM – 2025–2026 jyldarǵa arnalǵan kúzgi-qysqy kezeńge daıyndyq aıasynda «QazaqGaz» UK AQ basqarma tóraǵasynyń birinshi orynbasary Meıirbek Ihsanovtyń basshylyǵymen jáne enshiles, táýeldi kásiporyndardyń qatysýymen jumys keńesi ótti.
Búgingi kúni gaz taratý júıeleriniń jalpy daıyndyǵy 52%-dy quraıdy. Gaz rettegish pýnktterdiń aǵymdaǵy jóndeý jumystary júrgizilip jatyr, josparlanǵan kólemniń 46%-y oryndaldy. Shkaftyq jáne blokty rettegish pýnktterdiń aǵymdaǵy jóndeýi 47%-ǵa oryndaldy. Aýystyrý qurylǵylaryn tehnıkalyq qyzmet kórsetý – 58%, elektrohımııalyq qorǵaý quraldarynyń aǵymdaǵy jóndeýi – 56%. Gaz qubyrlaryn aspaptyq tekserý 42%-ǵa oryndaldy.
72,2 myń shaqyrym gaz taratý jelileri men qurylymdarynyń úzdiksiz jáne qaýipsiz jumysyn 4 064 óndiristik personal qyzmetkeri qamtamasyz etedi. Barlyq qyzmetker arnaıy kıimmen jáne jeke qorǵanys quraldarymen tolyq qamtamasyz etilgen.
Sonymen qatar magıstraldy gaz qubyrlarynyń jelilik bóliginde 367 aqaýdy joıyp, kúrdeli jóndeý júrgizý josparlanǵan, olardyń 284-i «Orta Azııa – Ortalyq» MGQ-da joıyldy. Jumys jospary kúrdeli jáne aǵymdaǵy jóndeýdi, sondaı-aq nysandardy modernızatsııalaýdy qamtıdy. Atap aıtqanda:
• «Buqara–Oral» MGQ-daǵy KS-12-de NK-12ST eki qozǵaltqyshyna kúrdeli jóndeý josparlanǵan;
• «Buqar gazdy aımaǵy–TBA» MGQ-da «Poltoratskoe» jáne «Akyrtóbe» kompressorlyq stantsııalarynyń jabdyqtaryn tehnıkalyq qyzmet kórsetý jáne jóndeý júrgizilip jatyr;
• «Soıýz», «Orenbýrg–Novopskov» jáne «Qartaly–Rýdnyı» MGQ-da aqaýly qubyrlardy aýystyrý josparlanǵan.
Jyl saıynǵy jylytý maýsymyna daıyndyq sharalarynan bólek, 2025 jyly apattyq jaǵdaılardy tómendetý, oqys oqıǵalardy boldyrmaý, kómirtegi totyǵymen ýlaný jaǵdaılaryn jáne gaz qysymynyń tómen bolý sebepterin joıý boıynsha jospardy júzege asyrý úshin qosymsha qarajat bólindi.
Bul sharalar júıeniń senimdiligin arttyrýǵa jáne kúzgi-qysqy kezeńniń qolaıly ótýin qamtamasyz etýge baǵyttalǵan.
