2025-2026 oqý jylyna granttar qalaı bólindi
ASTANA. KAZINFORM – Jańa oqý jylyna bólingen memlekettik bilim berý granttary men kvotalar týraly Joǵary jáne joǵary oqý ornynan keıingi bilim komıteti tóraǵasynyń orynbasary Janna Esınbaeva málim etti.
Derekke qaraǵanda, 2025–2026 oqý jylyna 77 myńnan astam grant bólingen. Onyń 60%-y tehnıkalyq baǵyttaǵy mamandyqtarǵa, 20%-y pedagogıkalyq mamandyqtarǵa, al qalǵan 20%-y basqa da salalarǵa suranysqa qaraı bólindi.
Kvotalyq granttar
QR «Bilim týraly» Zańyna sáıkes, áleýmettik osal sanattaǵy talapkerlerge arnalǵan kvotalyq granttar qarastyrylǵan. Atap aıtqanda:
-
jetim nemese múgedektigi bar balalar;
-
kópbalaly nemese tolyq emes otbasylardan shyqqan balalar;
-
múgedek balalardy tárbıelep otyrǵan otbasylardan shyqqan balalar.
Bul talapkerler kvota sheńberinde de, jalpy konkýrs aıasynda da grantqa úmitker bola alady.
Grant bólý júıesi qalaı qalyptasty?
Jyl saıyn memlekettik bilim berý tapsyrysy QR Eńbek jáne halyqty áleýmettik qorǵaý mınıstrliginiń eńbek naryǵyna qajetti mamandyqtar týraly taldaýy negizinde jasalady. Árbir sala boıynsha kadr qajettiligi anyqtalyp, soǵan sáıkes granttar bólinedi.
Saralanǵan granttar
2025 jyly qatarynan ekinshi ret saralanǵan granttar bólý jalǵasyn tapty. Eger 2024 jyly alǵash ret 300 saralanǵan grant usynylsa, bıyl da sol kólem saqtalyp otyr:
-
150 grant pedagogıkalyq mamandyqtarǵa,
-
150 grant jaratylystaný baǵytyna bólinedi.
Bul granttar negizgi konkýrs aıaqtalǵannan keıin jeke konkýrs retinde ótkiziledi. Qosymsha qujat tapsyrýdyń qajeti joq, óıtkeni talapkerler týraly barlyq málimetter Ulttyq testileý ortalyǵynyń bazasynda saqtalǵan. Saralanǵan granttardyń nátıjesi 2025 jylǵy qyrkúıek aıynyń sońynda jarııalanady.
Grant konkýrsyna qalaı qatysýǵa bolady
Memlekettik bilim berý granty UBT nátıjesine sáıkes beriledi. Qoldanystaǵy erejelerge sáıkes, talapker 4 joǵary oqý ornyn jáne 4 bilim berý baǵdarlamasyn tańdaý quqyǵyna ıe.
Eske sala keteıik, bilim granty ıegerleriniń tizimi 2025 jylǵy 7 tamyz kúni jarııalanady.