2024 jyly ishki naryq tolyqtaı otandyq almamen qamtamasyz etiledi

ASTANA. QazAqparat – 2024 jyly ishki naryq 100 paıyz otandyq almamen qamtamasyz etiledi. Bul jaıynda Májilistiń taratylǵan 7-shaqyrylym depýtattarynyń saýalyna qatysty Premer-Mınıstrdiń orynbasary – Saýda jáne ıntegratsııa mınıstri Serik Jumanǵarınniń jaýabynda aıtylǵan, dep habarlaıdy QazAqparat tilshisi.

«Qazaqstan Respýblıkasy Aýyl sharýashylyǵy mınıstrliginiń aqparaty boıynsha alma óndirisi salany damytý jónindegi strategııalyq qujattar aıasyndv agroónerkásip keshenin damytýdyń basym baǵyttarynyń biri sanalady. Osylaısha, AShM-de baqshalardy salýdy, jemis qoımalaryn salýdy, tehnıka satyp alýdy, kredıtter men lızıng boıynsha syıaqy mólsherlemelerin sýbsıdııalaýdy, elıtalyq kóshetterdi, tyńaıtqyshtardy, ósimdikterdi qorǵaý quraldaryn, «Agrarlyq kredıttik korporatsııa» AQ kredıttik ónimderin satyp alýdy sýbsıdııalaýdy, otandyq jáne sheteldik sarapshylar ótkizetin semınarlar, naqty konsýltatsııalar arqyly bilimdi taratýdy ınvestıtsııalyq sýbsıdııalaý túrinde memlekettik qoldaý is-sharalary kórsetiledi», - dep atap ótedi Serik Jumanǵarın jaýabynda.

Onyń atap ótýinshe, 2024 jylǵa qaraı elimizde almanyń jalpy jınalýyn 352,5 myń tonnaǵa deıin jetkizý josparlanǵan.

«Bul ishki naryqtyń qajettilikterin tolyq qamtamasyz etedi. Buǵan aldyńǵy jyldary salynǵan jáne 2024 jyly tolyq jemis berýge shyǵatyn alma baqtary esebinen qol jetkiziletin bolady», - dedi mınıstr.