2024 jyly ǵaryshqa qytaılyq «Venchan» ǵarysh aılaǵynan kommertsııalyq ushyrylymdar josparlanǵan

BEIJІŃ. QazAqparat – Ońtústik Qytaıdyń Haınan provıntsııasynyń bıligi maýsym aıynda ǵaryshqa turaqty kommertsııalyq ushyrylymdardy uıymdastyrý úshin «Venchan» ǵarysh aılaǵynda ushyrý alańdarynyń qurylysyn bastaýdy josparlap otyr. Bul týraly «Nanhaıvan» saıty jazdy, dep habarlaıdy QazAqparat menshikti tilshisi.

Venchan qalasynyń vıtse-meri Van Gýanchjıdiń aıtýynsha, alǵashqy eki ushyrylym alańynyń iske qosylýy «Venchan» ǵarysh aılaǵynan kommertsııalyq ǵaryshtyq ushyrylymdardy turaqty negizde júzege asyrý úshin jaǵdaı jasaıdy.

Ǵaryshtyq kommertsııalyq ushyrylymdar baǵdarlamasy Haınan aralynda halyqaralyq aeroǵaryshtyq qalany qurý sheńberinde iske asyrylýda. Zymyrandar men spýtnıkterdi qurastyrý jáne synaqtan ótkizý jónindegi zaýyttar, sondaı-aq derekter spýtnıkterin qoldaný jónindegi data-ortalyqtar salý kútilýde.

Venchan qalasynda aeroǵaryshtyq taqyryptaǵy týrıstik aımaqtar men Qytaıdyń ǵylymı-tehnıkalyq joǵary oqý oryndaryna arnalǵan zertteý ortalyqtaryn salý josparlanýda.

Jergilikti BAQ jazǵandaı, «Venchan» ǵarysh aılaǵynan ǵaryshtyq ushyrylymdar Venchan qalasynyń mańynda týrızmniń damýyna jańa serpin beredi. Bul qaladaǵy qonaqúı nómirleriniń barlyǵy derlik zymyran ushyrylǵanǵa deıin bir aı buryn brondalady.

Haınan aralynyń soltústik -shyǵys jaǵalaýyndaǵy «Venchan» ǵarysh aılaǵynan Qytaıdyń «Tıangýn» («Aspan saraıy») birinshi orbıtalyq stantsııasyn salý úshin «Tıanchjoý» júk kemeleri ushyrylady.