2024 jyly elimizde Búkilálemdik saıasattanýshylar kongresi ótýi múmkin
NUR-SULTAN. QazAqparat - Qazaqstan Búkilálemdik saıasattanýshylar kongresin ótkizýge ótinim berýdi josparlap otyr. Bul týraly Qazaqstannyń saıası zertteýler qaýymdastyǵynyń prezıdenti Esenjol Alııarov habarlady, dep habarlaıdy QazAqparat tilshisi.
«Biz Prezıdent ákimshiligimen kelise otyryp, 2024 jyly Qazaqstanda Búkilálemdik saıasattanýshylar kongresin ótkizýge ótinim berýdi josparlap otyrmyz», - dedi Esenjol Alııarov elordada ótken Qazaqstan saıasattanýshylarynyń kongresinde.
Sonymen birge, qaýymdastyq basshysy Qazaqstannyń saıası zertteýler qaýymdastyǵy men Saıası ǵylym qaýymdastyǵyn bir uıymǵa biriktirý jóninde sheshim qabyldanǵanyn aıtty.
«Búgingi kúnge deıin elimizde eki qaýymdastyq jumys istep keldi: Saıası ǵylym qaýymdastyǵy jáne Saıası zertteýler qaýymdastyǵy. Biz eki uıymdy Saıası zertteýler qaýymdastyǵyna qosý týraly sheshim qabyldadyq. Sebebi, Saıası zertteýler ınstıtýty Búkilálemdik saıası ǵylym qaýymdastyǵynyń múshesi sanalady», - dep túsindirdi ol.
Aıta keteıik, búgin Qazaqstan saıasattanýshylarynyń kongresi óz jumysyn bastady. Kongress aıasynda Qazaqstandaǵy saıası ǵylymnyń damý keleshegi, 2020 jyly Lıssabonda ótetin Búkilálemdik saıasattanýshylar kongresine qatysý máseleleri talqylandy.
