2024 jyly Demokratııalyq partııa atynan AQSh prezıdenti saılaýyna kim túsýi múmkin
Birinshi bolyp AQSh-tyń qazirgi vıtse-prezıdenti Kamala Harrısti ataýǵa bolady. Ol demokrattar atynan saılaýǵa túsýi múmkin úmitkerlerdiń biri retinde qarastyrylyp jatyr. 58 jastaǵy Kalıfornııanyń burynǵy senatory el tarıhyndaǵy alǵashqy áıel vıtse-prezıdent. Sondaı-aq osy laýazymǵa ıe bolǵan alǵashqy afroamerıkalyq ári shyqqan tegi azııalyq áıel retinde tarıhqa endi.
Taǵy bir úmitker - kólik mınıstri Pıt Býttıdjıg. Ol jaqynda ótken aralyq saılaý kezinde ulttyq demokratııalyq partııanyń suranysqa ıe orynbasarlarynyń biri boldy. P. Býttıdjıg 2020 jylǵy prezıdent saılaýynda Demokratııalyq partııa atynan kandıdattardyń biri boldy.
81 jastaǵy senator Bernı Sanders Dj. Baıdennen úlken jasy bolsa da, áli saıasat sahnasynan kete qoıǵan joq. 2016 jáne 2020 jyldary ol Aq úıdiń basshysy bolýǵa naýqan júrgizgen bolatyn, biraq eki ret te sátsizdikke ushyrady.
Kalıfornııalyq demokrat Ro Hanna sońǵy aılarda tsıfrlyq tehnologııalar dáýirindegi ar-ujdan jaıly óziniń kitabyn jarnamalap, búkil eldi aralap shyqty. R. Hanna Aq úıge úmitker bolǵysy keletinin jasyrmaıdy. Alaıda, ol Kalıfornııa okrýginen tys jerlerde asa tanymal emes.
Demokrattarda tıimdi naýqan uıymdastyra alatyn birneshe tanymal gýbernator da bar. Máselen, Mıchıgan shtatynda gýbernator Grethen Ýıtmer respýblıkashylardyń synyna qaramastan, osy aıda qaıta saılaýda jeńiske jetti. G.Ýıtmer sonymen qatar Dj. Baıdenniń 2020 jylǵy naýqanynda jeńiske jetýinde sheshýshi ról atqarǵan kásipodaqtarmen tyǵyz baılanys ornatqan.
Sondaı-aq, Kalıfornııa shtatynyń gýbernatory Gevın Nıýs Aq úıge úmitker retinde qarastyrylyp jatyr. Nıýs te Ýıtmer sııaqty ekinshi merzimge aıqyn basymdyqpen qaıta saılandy.
Foto: static.nation-news.ru
