2024 jylǵy jazǵy Olımpıadany ótkizýden úmitti qalalar anyqtaldy
ASTANA. QazAqparat - 2024 jylǵy jazǵy Olımpıadany ótkizýden úmitti qalalar belgili boldy. Keshe Halyqaralyq Olımpıada komıtetine (HOK) sońǵy bolyp AQSh-tyń Los-Andjeles qalasy óz ótinimin bildirdi. Bul týraly AQSh Ulttyq Olımpıada komıtetiniń (USOC) resmı saıtyna silteme jasaǵan eurosport.ru habarlady.
Los-Andjeles buǵan deıin eki márte, ıaǵnı, 1932 jáne 1984 jyldary atalǵan Oıyndardy qabyldady. Eger osy joly da dúbirli dodany uıymdastyrý quqyǵyn jeńip alsa, Los-Andjeles úsh ret Olımpıada ótken ekinshi qala retinde tirkeledi. Ázirge mundaı jetistikpen tek Ulybrıtanııanyń astanasy - London qalasy ǵana maqtana alady. Aıta keteıik, alǵashynda AQSh-tyń Boston qalasy úmitkerlerdiń qatarynda bolǵan. Keıin atalǵan qala basshylyǵy óz ótinimderin keri qaıtaryp aldy. Al sońǵy kúnderi onyń ornyn Los-Andjeles basty. Sonymen qatar, 2024 jylǵy Olımpıadany ótkizýden myna qalalar úmitti: Gambýrg (Germanııa), Rım (Italııa), Parıj (Frantsııa) jáne Býdapesht (Vengrııa). Olımpıada astanasy 2017 jyly 15 qyrkúıekte Lıma qalasynda (Perý) ótetin HOK-tiń 130-sessııasynda anyqtalady. Al oǵan deıingi 2016 jáne 2020 jylǵy jazǵy Olımpıadalar tıisinshe Rıo-de-Janeıro (Brazılııa) men Tokıoda (Japonııa) ótkiziledi, dep jazady egemen.kz. Foto: eurosport.ru.
