2024 jylǵa qaraı Qaraǵandydaǵy kásiporyndar aýany lastamaıtyn bolady - ákim
NUR-SULTAN. QazAqparat - Balqashtaǵy «Qazaqmys» JShS birneshe jyl qatarynan aýaǵa bólinetin zııandy zattardyń kólemin azaıtý baǵdarlamasy boıynsha jumys isteýde. Bul týraly Ortalyq kommýnıkatsııalar qyzmetinde ótken brıfıngte Qaraǵandy oblysynyń ákimi Jeńis Qasymbek aıtty, dep habarlaıdy QazAqparat tilshisi.
«Bul - óte ózekti másele. Keshe qala ákimi men barlyq óndiristik kásiporyndardyń basshylarynyń qatysýymen úlken jınalys ótti. Temirtaý - qalasy ekologııalyq turǵyda kóbirek lastanǵan qala. Bir jarym aı buryn QR Ekologııa mınıstri kásiporyndarmen atmosferaǵa zııandy zattardy shyǵarý mólsherin tómendetý kestesi boıynsha kásiporyndarmen memorandýmǵa qol qoıdy», - deıdi Jeńis Qasymbek.
Ol bul shara jetkilikti emes ekeni týraly aıtty.
«Bul jetkilikti shara emes, sebebi Temirtaýǵa barǵanda jaǵdaı qalaı ekenin ózderińiz de kórip júrsizder. Qazir kásiporynnyń basshylyǵy aýysqan. Bul suraq boıynsha bólek keń kólemde jınalys ótedi. Sol kezde aýaǵa zııandy zattardyń bólinýin azaıtý, týraly talqylaımyz. Sondaı-aq, qazirgi ýaqytta Parlamentte Ekologııalyq kodeks qaralyp jatyr. Ol jerde de óndiris kásiporyndaryna qoıylatyn talaptar kúsheıgen», - deıdi ol.
Mysaly, Balqashtaǵy «Qazaqmys» JShS birneshe jyl qatarynan aýaǵa bólinetin zııandy zattardyń kólemin azaıtý baǵdarlamasy boıynsha jumys isteýde.
«Nátıje aıtarlyqtaı jaqsarǵan. 2024 jylǵa qaraı ol zaýytta aýany lastaýshy zat múlde bolmaıdy. Mundaı jumystardy oblystaǵy aýany lastaýshy barlyq kásiporyndarda júrgizetin bolamyz», - deıdi oblys ákimi.
Sondaı-aq, ol Qaraǵandydaǵy Medıtsınalyq ýnıversıtette 1,5 myń sheteldik stýdent oqıtynyn aıtty.
«Bilim sapasy jaqsy. Biz ózge óńirlerden kelip Qaraǵandyda em alatyndar úshin kvota beremiz. Óńirde onkologııalyq dertten kóz jumatyndar sany ortashadan tómen. Júrek qan-tamyrlary aýrýynan kóz jumatyndar sany birinshi orynda», - deıdi ol.
