2024 jyldan bastap Parlament memlekettik aktıvterdi basqarýdyń jyldyq esebin tyńdaıdy

ASTANA. QazAqparat – 2024 jyldan bastap Parlamentke memlekettik aktıvterdi basqarý jónindegi Ulttyq baıandama tanystyrylady, dep habarlaıdy QazAqparat tilshisi.

QR Premer-Mınıstriniń Májilis depýtattarynyń saýalyna bergen jaýabynda bul shara dástúrge aınalatyny aıtylǵan.

«Parlamenttiń kvazımemlekettik sektordyń máselelerine belsendi tartylýy zańnamadaǵy eleýli ózgeris boldy. 2024 jyldan bastap Parlamentke memlekettik aktıvterdi basqarý jónindegi Ulttyq baıandama tanystyrylady. Mundaı eseptilik jyl saıyn beriledi jáne kvazımemlekettik sektor sýbektileriniń jumys tıimdiligin tolyq qamtyp taldaýǵa múmkindik beredi. Qarjylyq jáne qarjylyq emes qyzmetterdiń nátıjesi, áleýmettik jáne ózge de máselelerdi qalaı sheshkeni de esepke alynady. Jalpy osy qabyldanǵan sharalar kvazımemlekettik sektor sýbektilerin esep bere otyryp qyzmet etýge ıtermelep, ashyqtyqty qamtamasyz etedi», - dep jazady Álıhan Smaıylov.