2024 jyly salyq boıynsha 35 myń tekserý aıaqtaldy — Qarjy mınıstrligi
ASTANA. KAZINFORM — Kirister boıynsha jospardyń oryndalmaýy 609 mlrd teńge. Bul týraly Parlament Májilisinde 2024 jylǵy bıýdjettiń atqarylýy týraly Úkimet esebin tanystyrý kezinde Qarjy vıtse-mınıstri Dáýren Temirbekov málim etti.
— Bıýdjet túsimderi 97,5 paıyzǵa atqarylyp, 19 trln 945 mlrd teńgeni qurady. Shyǵystar 23 trln 594 mlrd teńgege nemese 97,8 paıyzǵa iske asyryldy. Bıýdjet tapshylyǵy 3 trln 649 mlrd teńgeni nemese jalpy ishki ónimge shaqqanda 2,7 paıyzdy qurady, — dedi D. Temirbekov.
Onyń aıtýynsha, 2024 jylǵa arnalǵan respýblıkalyq bıýdjettiń kiristeri boıynsha jyldyq jospar 97,2 paıyzǵa oryndaldy, ıaǵnı 20,2 trln teńge jospar aıasynda bıýdjetke 19,6 trln teńge tústi. Sonyń arasynda respýblıkalyq bıýdjettiń menshikti kiristeri 13,5 trln teńgege jetti nemese jospardyń oryndalýy 95,7 paıyz. Kirister boıynsha jospardyń oryndalmaýy 609 mlrd teńge.
— 2024 jyly shamamen salyq boıynsha 35 myń tekserý aıaqtaldy. 14 paıyz ósý qarqynymen 377 mlrd teńge qosymsha salyq esepteldi. 140 mlrd teńge óndirilip alyndy. Qazirgi kezde ákimshilendirýge de, qashyqtan baqylaýǵa da basa nazar aýdarylǵan kameraldyq baqylaý únemi jetildirilip otyrady. Adamı faktordy alyp tastaı otyryp, avtomattandyrylǵan servıstik modelge ótip jatyrmyz. Máselen, 2023 jylǵy 1 qańtardan bastap kameraldyq baqylaý habarlamasyna jaýap bergen salyq tóleýshiler boıynsha bank shottary buǵattalmaıdy. Osy oraıda kásipkerdiń qarjy-sharýashylyq qyzmeti shektelmeıdi, — dedi vıtse-mınıstr.
Onyń sózine qaraǵanda, kameraldyq baqylaý boıynsha 2024 jyly 536 mlrd teńge qosymsha eseptelip, bıýdjetke 262 mlrd teńge óndirilip alyndy.
Budan buryn Parlament Májilisi Qazaqstan Úkimetiniń jáne QR Joǵary aýdıtorlyq palatasynyń 2024 jylǵy respýblıkalyq bıýdjettiń atqarylýy týraly esepterin talqylaıtynyn jazǵan edik.
Eske salsaq, Májilis depýtaty Murat Ergeshbaev bıýdjet tapshylyǵyna josparlaý tásilindegi kemshilikter áser etip otyrǵanyn aıtqan edi.