2024 jyly iri kásiporyndardyń zııandy shyǵaryndylary 6% azaıdy – Ekologııa mınıstrligi

ASTANA. Kazinform – Elimizde iri ónerkásiptik kásiporyndardyń shyǵaryndylaryna monıtorıng jasaýdyń avtomattandyrylǵan júıesin ornatý jumysy aıaqtalýǵa jaqyn. Bul týraly QR Ekologııa jáne tabıǵı resýrstar vıtse-mınıstri Jomart Álıev aıtty.

— 2024 jyldyń qorytyndysy boıynsha normatıvtik shyǵaryndylar kólemi shamamen 1%-ǵa tómendedi. Bul kórsetkishtiń mardymsyz bolýy eldegi jalpy ekonomıkanyń ósýimen jáne ınvestıtsııa tartý aıasynda júzege asyrylyp jatqan jobalarmen baılanysty. Sonymen qatar, eldegi eń iri 50 ónerkásiptik kásiporynnyń (TOP-50) qataryna kiretin jáne zııandy zattardyń negizgi úlesin (63%) quraıtyn 1-sanattaǵy nysandar boıynsha shyǵaryndylar shamamen 6%-ǵa azaıdy, — dedi ol OKQ alańynda.

Vıtse-mınıstrdiń aıtýynsha, óńirlik ekologııalyq problemalardy keshendi sheshý úshin bekitilgen 19 jol kartasy aıasynda 600 is-shara qarastyrylǵan. Olardyń 454-i nemese 76%-y oryndalǵan, al qalǵan 146-syn iske asyrý merzimi belgilengen.

— Іri ónerkásiptik kásiporyndardyń shyǵaryndylaryn baqylaý maqsatynda avtomattandyrylǵan monıtorıng júıelerin (AMJ) ornatý jumystary aıaqtalýǵa jaqyn. Qazirgi tańda AMJ ornatýǵa mindetti 91 kásiporynnyń 72-si (79%) júıeni ornatyp, derekterdi «Qorshaǵan ortanyń jáne tabıǵı resýrstardyń jaı-kúıi týraly ulttyq derekter banki» aqparattyq júıesine jiberýde, — dedi Jomart Álıev. 

Aıta keteıik, buǵan deıin 10 óńir ónerkásiptik shyǵaryndylardy avtomatty baqylaý júıesin ornatýǵa qarjy tappaı otyrǵanyn jazǵan edik.