2024 jyly múgedektigi bar adamdar portal arqyly 777 myńnan astam qyzmet túrine júgindi
ASTANA. KAZINFORM – 2024 jyldyń basynan bastap Áleýmettik qyzmetter portaly (budan ári – Portal) arqyly shamamen 675,4 myń múgedektigi bar adam ońaltýdyń tehnıkalyq quraldaryn (budan ári – OTQ), 8,5 myń – ymdaý tili qyzmetin, 26,2 myń – jeke kómekshiniń, 67,3 myń – sanatorıılik-kýrorttyq emdeý qyzmetin aldy. Bul týraly Eńbek jáne halyqty áleýmettik qorǵaý mınıstrliginiń baspasóz qyzmeti habarlady.
Portal múgedektigi bar adamdarǵa ońaltýdyń tehnıkalyq quraldary men qyzmetterin óndirýshini jáne jetkizýshini óz betinshe tańdaýǵa múmkindik beredi. Kómek túrine tapsyrys berý kórsetiletin qyzmetti alýshynyń elektrondyq tsıfrlyq qoltańbasymen rastaý arqyly júzege asyrylady. Tapsyrys berilgen ońaltýdyń tehnıkalyq quraldaryn jetkizý nemese óz betinshe áketý arqyly alýǵa bolady.
Múgedektigi bar adamdardy ońaltý quraldarymen qamtamasyz etý protezdik-ortopedııalyq, sýrdotehnıkalyq, tıflotehnıkalyq jáne gıgıenalyq quraldar, sondaı-aq kreslo-arbalar berýdi qamtıdy.
Búgingi kúni Portalda 895 arnaýly áleýmettik qyzmetter kórsetetin ortalyq (bólimsheler), 792 OTQ jetkizýshi, 30 myńnan astam jeke kómekshi, 756 ymdaý tili jáne 125 sanatorıılik-kýrorttyq emdeý qyzmetterin usynýshy tirkelgen.
«Áleýmettik qyzmetter portaly» avtomattandyrylǵan aqparattyq júıesin engizý Múgedektigi bar adamdardyń quqyqtaryn qamtamasyz etý jáne ómir súrý sapasyn jaqsartý jónindegi ulttyq jospar sheńberinde qarastyrylǵan.
Buǵan deıin habarlanǵandaı, QR Áleýmettik kodeksin iske asyrý sheńberinde jergilikti atqarýshy organdar janynan qurylǵan Portal jónindegi komıssııalarǵa jańa ókilettikter berilgen: múgedektigi bar adamdardyń sapasyz taýar nemese qyzmet týraly ótinishin 5 kún ishinde qabyldaý jáne qaraý; ónim berýshige hat joldaý jáne onyń oryndalýyn baqylaý; ónim berýshini Portaldan shyǵarý jáne josyqsyz ónim berýshiler tizimine engizý týraly sheshim qabyldaý.
Portaldy paıdalaný boıynsha konsýltatsııalardy qoldaý baılanys ortalyǵynan, ıaǵnı 1414 biryńǵaı nómiri arqyly habarlasýǵa bolady.
