2024 jyly Qazaqstanda sheteldikterdiń qatysýmen 40-tan astam iri joba iske qosylady
ASTANA. KAZINFORM - QR Premer-Mınıstri Oljas Bektenov «Kazakh Invest» UK» AQ dırektorlar keńesiniń otyrysyn ótkizdi. Otyrysta ulttyq kompanııanyń aǵymdaǵy qyzmeti men aldaǵy jumys josparlary qaraldy.
Bul týraly QR Úkimetiniń baspasóz qyzmeti habarlady.
Baspasóz qyzmetiniń málimetterine qaraǵanda, qazirgi ýaqytta Kazakh Invest jalpy quny $27,3 mlrd-ty quraıtyn 200 jobaǵa qoldaý kórsetýde. Atalǵan sharalar aıasynda 68,8 myń jumys ornyn qurý kózdelgen. Bıyl sheteldikterdiń qatysýmen 40-tan astam joba iske qosylady dep kútilýde.
Olardyń ishinde eń mańyzdylarynyń biri – Astana qalasynda ornalasqan amerıkalyq GE Healthcare kompanııasynyń medıtsınalyq qural-jabdyqtaryn shyǵaratyn kásiporyn. Joba sheńberinde ÝDZ jáne KT apparattarynyń óndirisi lokalızatsııalanady. Bul qazaqstandyq aýrýhanalardy qamtamasyz etip qana qoımaı, bolashaqta basqa elderge eksportty jolǵa qoıýǵa múmkindik beredi. Sonymen qatar kompanııa respýblıkanyń densaýlyq saqtaý júıesindegi kadrlardyń biliktiligin arttyrý úshin bilim berý baǵdarlamalaryn uıymdastyrýdy josparlap otyr.
Sondaı-aq shveıtsarııalyq Roche kompanııasy aldaǵy ýaqytta eksportqa shyǵý perspektıvasymen Almatyda isikke qarsy preparattar óndirisin iske qosady.
Avstrııalyq Lasselsberger kompanııasy Astanada keramıkalyq plıtkalar, qurǵaq qurylys qospalary men qurylys jelimderi óndirisin lokalızatsııalaýda. Jańa zaýyttyń ashylýy 200-den astam jumys ornyn qurýǵa múmkindik beredi jáne Qazaqstan naryǵynyń osy ónimderdegi ımportqa táýeldiligin tómendetedi.
Premer-Mınıstrdiń tapsyrmasy boıynsha Kazakh Invest aldaǵy jumysynda astyqty tereń óńdeý, plastmassanyń suranysqa ıe túrlerin óndirý, munaı-gaz jabdyqtaryn jáne ımport kólemi joǵary basqa da taýarlardy oqshaýlaý boıynsha perspektıvaly jobalarǵa ınvestorlar tartýǵa basymdyq beretin bolady.
«Memleket basshysy 2029 jylǵa qaraı ekonomıka kólemin $450 mlrd-qa deıin ulǵaıtý mindetin qoıdy. Sondyqtan iri ınvestorlardy izdeý jáne olardy elimizge tartý boıynsha jumysty kúsheıtý kerek. Bul oraıda batyl ári jańashyl sheshimder qajet», - dep atap ótti Premer-Mınıstr.
