2024 jyly Qazaqstanda sheteldik jumyskerlerge bólingen kvota sany jarııalandy
QR Eńbek jáne halyqty áleýmettik qorǵaý mınıstrligi ishki eńbek naryǵyn qorǵaý maqsatynda jyl saıyn jumys berýshilerdiń qajettilikterine qaraı sheteldik jumys kúshin tartýǵa kvota mólsherin bekitip, bóledi. 2024 jyly bólingen jalpy kvota sany elimizdegi jumys kúshiniń 0,23%-yn nemese 22 myńdy quraıdy, dep habarlaıdy Kazinform.
«2024 jyly shetelden jumys kúshin tartý boıynsha 4 sanatta kvota bólindi: birinshi sanat boıynsha 906 ruqsat (basshylar jáne olardyń orynbasarlary), ekinshi sanat — 5 054 ruqsat (qurylymdyq bólimshelerdiń basshylary). Ruqsattardyń negizgi bóligi úshinshi (mamandar) jáne tórtinshi (bilikti jumysshylar) sanattarǵa jatady — tıisinshe 10 786 jáne 2 888 birlik. Sondaı-aq maýsymdyq jumystarǵa 2 366 adamǵa deıin jumys kúshi tartylýy múmkin», — dep jazdy mınıstrlikten.
Budan basqa, 2024 jyly úı sharýashylyqtarynda jumys isteý úshin eńbek ımmıgranttardy tartýǵa arnalǵan kvota respýblıkadaǵy jumys kúshiniń sanyna qatysty 3,1% nemese 271,3 myń birlik mólsherinde belgilengen.
Esterińizge sala keteıik, 2023 jyly jergilikti atqarýshy organdar jumys berýshilerge ShJK tartý úshin 14,5 myń ruqsat berdi jáne uzartty, bul qaıta bólingen kvotanyń 78,5% — yn (18 myń) qurady.
«Qazirgi ýaqytta Qazaqstan aýmaǵynda jergilikti atqarýshy organdardyń ruqsaty boıynsha 13 183 shetel azamaty jumys isteıdi.
2023 jyly úı sharýashylyqtarynda jumys isteý úshin eńbek ımmıgranttaryn tartýǵa 305,8 myń birlik kvota belgilendi. Al jergilikti atqarýshy organdar 295 261 ruqsat berdi», — delingen derekte.
