2024 jyly ınflıatsııa – 8,4%, 2025 jyly 6,7% bolady – Ulttyq Bank
ASTANA. KAZINFORM – Qazaqstan Ulttyq Banki sarapshylar qaýymdastyǵy arasynda júrgizilgen kezekti makroekonomıkalyq saýalnamanyń nátıjesin jarııalady. Olar ınflıatsııa, jalpy ishki ónim jáne bazalyq mólsherleme boıynsha boljamdaryn aıtty. Bul týraly Ulttyq banktiń baspasóz qyzmeti málim etti.
Saýalnamanyń negizgi parametrleri retinde Brent markaly munaıdyń baǵasy, Qazaqstan ekonomıkasynyń ósýi, ınflıatsııa, bazalyq mólsherleme, taýarlar men qyzmetterdiń eksporty jáne ımporty tańdalǵan.
«Qyrkúıekte munaı baǵasy boıynsha stsenarıı sharttary barlyq boljamdy kezeńde tómendeý jaǵyna qaraı qaıta qarastyryldy. Osylaısha, Brent markaly munaı baǵasy boıynsha respondentterdiń 2024 jylǵa kútýleri ortasha jyldyq eseppen barreline — 83,5-ten 80 AQSh dollaryna deıin, 2025-2026 jyldarǵa — 80-nen 75 AQSh dollaryna deıin tómendedi», — dep habarlady Ulttyq bankten.
2024 jáne 2025 jyldarǵa arnalǵan Qazaqstan ekonomıkasynyń ósimine qatysty boljamdar 4% jáne 5% deńgeıinde saqtaldy, al 2026 jylǵa boljam 4,4%-dan 4,5%-ǵa deıin birshama ósti.
Respondentter 2024 jylǵa arnalǵan ınflıatsııaǵa qatysty boljamdaryn 8%-dan 8,4%-ǵa deıin kóterdi, al 2025 jylǵa — 6,9%-dan 6,7%-ǵa deıin tómendetti. 2026 jyly ınflıatsııa burynǵydaı 6% deńgeıinde kútilip otyr.
Sarapshylar joǵary bazalyq mólsherleme buryn kútilgennen sál uzaǵyraq saqtalady dep boljaıdy. Osylaısha, boljamǵa saı 2024 jylǵa jyldyq ortasha 14,5%-dan 14,6%-ǵa deıin, 2025 jylǵa — 11,9%-dan 12%-ǵa deıin, 2026 jylǵa — 10%-dan 10,1%-ǵa deıin ósti.
Saýalnamaǵa Qazaqstan aýmaǵynda makroekonomıkalyq kórsetkishterdi taldaýmen jáne boljaýmen aınalysatyn 15 uıym qatysty. Respondentterdiń qataryna naryqtyń kásibı qatysýshylary, zertteý ınstıtýttary, halyqaralyq uıymdar men reıtıngtik agenttikter kiredi.
Makroekonomıkalyq saýalnamaǵa Ulttyq Bank boljamdary kirmeıtinin eske salamyz. Onda qazaqstandyq jáne álemdik naryqtardaǵy ahýaldyń damý barysyna qatysty naryqtaǵy kásibı qatysýshylardyń táýelsiz pikirlerine, baǵalaýlaryna jáne kútýlerine sholý jasalady.
Eske sala keteıik, buǵan deıin Qazaqstan Respýblıkasyna arnalǵan mıssııanyń qorytyndysy boıynsha Halyqaralyq Valıýta Qorynyń qorytyndysyna saı, ınflıatsııa 2027-2028 jyldarǵa qaraı 5%-ǵa deıin tómendeıtinin jazǵan bolatynbyz.
