2024 jyly elimizge Qytaıdan 655 myń týrıst keldi
ASTANA. KAZINFORM – 2024 jyly elimizge Qytaıdan 655 myń týrıst keldi. Bul týraly Ortalyq kommýnıkatsııalar qyzmetindegi brıfıngide Týrızm jáne sport mınıstrligi Týrızm ındýstrııasy komıtetiniń tóraǵasy Nurtas Káripbaev aıtty.

— Qazaqstanǵa kelgen qytaılyqtar sany aıtarlyqtaı ósti. 2024 jyly Qytaıdan kelgen týrıster legi 655 myń adamdy qurady. Bul 2023 jylmen salystyrǵanda 78 paıyzǵa kóp. Kórsetkish Qytaı azamattarynyń mádenı jáne tabıǵı muramyzǵa degen qyzyǵýshylyǵynyń artyp kele jatqanyn kórsetedi. Sonymen qatar týrızm jyly aıasynda óńirler, týrkompanııalar, agenttikter men medıa platformalar arasynda 200-den astam kelisimge qol qoıyldy. Bul ózara is-qımylǵa berik negiz boldy, - dedi ol.
Komıtet tóraǵasynyń aıtýynsha, is-sharalar aqparattyq alańda da keńinen kórinis tapty. 1,3 mlrd-tan astam aýdıtorııasy bar qytaılyq iri medıa men áleýmettik jelilerde Qazaqstan týraly habar taratty. Bul elimizdiń týrıstik baǵyt retinde tanylýyn aıtarlyqtaı arttyrýǵa múmkindik berdi.
— Resmı túrde 2025 jyl Qytaıdyń Qazaqstandaǵy týrızm jyly bolyp jarııalanǵanyn atap ótý kerek. Bul ekijaqty qarym-qatynastardyń tereńdeı túskenin kórsetedi. Ári bul eki tarapqa yntymaqtastyqty odan ári nyǵaıtýda jańa múmkindikter beredi. Osynyń bári týrızmniń damýyna yqpal etip qana qoımaı, halyqtar arasyndaǵy mádenı jáne ekonomıkalyq baılanystardy nyǵaıtýǵa mańyzdy úles qosady, - dedi Nurtas Káripbaev.
Aıta keteıik, «Qytaıdaǵy Qazaqstan týrızmi jylynyń» resmı ashylýy Beıjiń qalasynda 2023 jyldyń 28-29 naýryzynda ótti. Onda eki el arasyndaǵy týrıstik jáne mádenı baılanystardy damytý, týrıstik salaǵa ınvestıtsııa tartý josparlary talqylandy.
Resmı ashylý saltanaty Qytaı Ulttyq opera úıinde uıymdastyryldy. Іs-sharaǵa 500-den astam qonaq qatysty. Qytaıdyń 30-dan astam ortalyq medıasy jan-jaqty habar taratty. Al Týrızm jylynyń resmı jabylýy 2024 jyly 27 qarashada Almaty qalasynda boldy. Qazaqstannyń Qytaıdaǵy týrızm jylynyń qorytyndysyna arnalǵan halyqaralyq forým uıymdastyryldy. Oǵan eki eldiń týrıstik ındýstrııasynyń 300-den astam ókili qatysty.
Buǵan deıin Qytaıdaǵy Qazaqstan týrızmi jyly ishki týrızmge qandaı serpin bergenin jazǵan edik.