2024 jyly elimizde ınjenerlik jelilerdi jóndeýge 450 mlrd teńgeden astam ınvestıtsııa salynady

ASTANA. KAZINFORM - Memleket basshysy Qasym-Jomart Toqaevtyń tapsyrmasy boıynsha QR Úkimeti elimizdiń búkil turǵyn úı-kommýnaldyq salasyn aýqymdy jańǵyrtýdy júzege asyrýda.

Máselen, 2023 jyly kommýnaldyq ınfraqurylymdy jańǵyrtýǵa 500 mlrd teńge, onyń ishinde bıýdjet esebinen – 327 mlrd teńge baǵyttaldy. Nátıjesinde birqatar iri jylý kózderi men 5,8 myń km ınjenerlik jeliler jóndeldi.

Bıyl bul maqsattarǵa 450 mlrd teńgeden astam ınvestıtsııa tartylyp, 6,5 myń km ınjenerlik jeli jóndeledi.

Jalpy, júrgizilip jatqan tarıftik reformanyń arqasynda 2029 jylǵa deıin 62 myń km ınjenerlik jelilerdi jańǵyrtý jáne tozýdy 20%-ǵa azaıtý úshin shamamen 3 trln teńge ınvestıtsııa tartý josparlanyp otyr. Bul kommýnaldyq ınfraqurylymdy normatıvtik jaǵdaıǵa jetkizýge múmkindik beredi.