2024 jyly áleýmettik osal toptaǵy 4,5 otbasy baspanamen qamtamasyz etildi — mınıstr
ASTANA. KAZINFORM — Búgin Májilistiń jalpy otyrysynda 2024 jylǵy respýblıkalyq bıýdjettiń atqarylýy týraly Úkimet esebin talqylaý kezinde QR Qarjy mınıstri Mádı Takıev bıýdjet shyǵystaryna túsinik berdi.
— Bıýdjet shyǵystary 98 paıyzǵa oryndalyp, 23,6 trln teńgeni qurady.
Igerilmegen qarajat — 526 mlrd teńgeni, onyń ishinde Úkimet rezervi men basqa da únemdeý 12 mlrd teńgeni qurady. Sonymen qatar, esepti kezeńde áleýmettik mańyzy bar birqatar baǵyttar qarjylandyryldy. Mektepke deıingi bilim berý uıymdaryndaǵy pedagogterdiń eńbekaqysyn kóterýge 93,8 mlrd teńge bólindi. Áleýmettik osal toptaǵy 4 557 otbasy turǵyn úımen qamtamasyz etildi. 3 myń 412 km sýmen jabdyqtaý men sý burý jelileri salyndy jáne rekonstrýktsııalandy, 90,1 km jylýmen jabdyqtaý jelileri jóndeldi, — dedi M. Takıev.
Onyń aıtýynsha, bıýdjettik ınvestıtsııalyq jobalardy iske asyrý nátıjesinde 2024 jyly halyq sany 213 myń adamnan turatyn 62 eldi meken gazben jabdyqtaldy. «Aýyl — el besigi» aıasynda 168 jobany iske asyrý boıynsha shamamen 152 aýyldy eldi meken qamtyldy.
— 2024 jyly 12 myń km jol salý jáne jóndeý jumystary júrgizildi. Agroónerkásip kesheniniń 505 sýbektisi qarjylandyrylyp, 3 585 sýbektige kredıt berildi, 577 myń tonna aýyl sharýashylyǵy ónimi satyp alyndy. Sonyń arqasynda Agroónerkásip kesheniniń sýbektileri 2024 jyly 3,2 mln gektardan astam alqapta egis jumystaryn belgilengen merzimde júrgizdi, — dedi mınıstr.
Budan buryn habarlanǵandaı, byltyr respýblıkalyq bıýdjettiń kiristeri jyldyq jospardan 97,2 paıyzǵa oryndaldy.